Vawiin chawhma lam dar 11:00 vel khan Mizoram sorkar-a Aizawl District Magistrate chuan Aizawl Chawnpui veng mawng (Ebenezer Damdawi In bul) a chhungkaw thumte chu an in atanga hnawt chhuakin, an In pawh a kalh sak nghal a, heng chhungkaw thumah hian member 33 lai an awm a. An awmzel dan tur zawhna chu chhangin an zinga pakhat chuan, “Kan In ber an kalh tak si ah chuan chaw pawh kan nghei ang a, zanah pawh khawlaiah hian kan riah mai a ngai dawn a ni,” a ti.
Hun engemaw chen atang tawh khan helaia awmte hi an ram a nih loh avangin chhuak turin sorkar lam chuan a ti thin a, kuminah pawh chhuak tura tihna lehkha hi vawi 3 vel an pe tawh niin thudawnna chuan a sawi a. An chhuah duh tak si loah chuan vawiin khan Aizawl District Magistrate hian Police engemaw zat hruaiin an hnawtchhuak ta a, In atang hian an chhuah duh mai si loh avangin a vuakte pawh an invaw ve nak nak niin thu dawn a ni bawk.
Chawnpui Local Council Chairman chuan helai ram chungchangah hian kum thum vel kalta khan Court-in in sa tute hi thiamloh chantirin, chhuak turin a lo tih tawh thu leh tun tuma buaina an neih pawh an hriatpui loh thu a sawi a. In an sakna hmun hi PWD road reserve chhung a nih avangin han puingaihna vak a awm loh thu a sawi bawk.
