ZPM chuan vawiin khan an Party Office-ah chhung inkhawm hun an hmang a, thusawitu K. Sapdanga, Home Minister chuan, “Sorkar hrang hrangin Flagship Programme kan nei thin a, keini chuan kum khat lek chhungin kan flagship programme kan tihlawhtling nghal a. Mahni Flagship programme, sorkar kum khatnaa bawhzui awm chhun chu ZPM sorkar chauh hi a la ni,” a ti.
Minister Sapdanga chuan, “Mipui sorkar lak luh kan nih chiah khan Chief Minister Pu Lalduhoma chuan a minister-ten ni 100 chhunga thawh zawh tur home work min siam a, Pathian zarah ni 100 chhungin kan zo thei. CM Home work min pek kha a huphurhawm khawp mai a, sorkar thar lawmna inchibaina hun pawh awm miah lovin kan phe nghal sung sung a, kalphung thar kan hmu nghal a ni. Thlai thar leina tur sum budget-ah dah a ni a, sawisel ngar ngartute sawhthing nen lam kan lei a. A kum khatnaah hmun 672 atangin sawhthing quintal nuai 3 vel lei a ni a, cheng vaibelchhe 120 velin thingtlanga sawhthing chingtu kuthnathawktute chhungkaw sing hnih vel choka a thleng. Technical problem avangin sawhthing hralhtute hnenah sum tlema zawng kan la thun thei lo va, rei lo teah an thawh hah man an hmu ang. Thalaiten an thiam zawng leh tui zawnga eizawn bul tanna an neihna turin Hand Holding Schem hmangin hma kan la mek a, he policy hi mi taima leh mi dikte tan chuan hahdam taka eizawn bul tanna a ni a, dinchhuahpui awlsam tak a ni. Sum puk rul tha duh lo leh hmang dik lote tan erawh chhiatpui hlen theih, tu leh fate thlenga leiba rulhsen loh neih theihna, policy tihbaiawm tak a ni a, Taima leh Dikte pual project a ni. Flagship Programme tihhlawhtlin vat hi atna a nih ngai chuan, kan hotupa ho hian, kuthnathawktute tan kan lo a zel phawt ang” a ti.
Home Minister chuan, “Chief Minister-in minister te tlawh kualin, kan hmalak dan leh harsatna te enpuiin theih tawp a chhuahpui thin a, hei hi chhawm nun zel tlak a ni. Mi harsa zawkten damdawi ina a thlawna enkawlna an dawn theih dan Mizoram Universal Health Care Scheme (MUHCS) ruahman a ni a. He Health Care Scheme tihlawhtling tur hian, tlema khawsa thei deuhten Chhiatni Fund thawh khawmin an luang chhuak mek. Sorkar hnathawkte leh private hospital-te nen lungrual taka thawh ho dan kawng daptu Review Committee din a ni a, Health Care Scheme kalphung siam that ngaite siam thain ngawrh takin an thawk mek a, rah tha tak a chhuah thuai beisei a ni,” a ti bawk.
ZPM Party chhung inkhawmah hian President Lalliansawta chuan Congress Party atangin Lalhruaitluanga Kawlni – MPCC Media Secretary, Lalsangpuia Khiangte, Ramhlun Venglai, MPCC Executive Member, Zohmingthanga Tlau, Ramhlun Venglai, MPCC Secretary ni reng tawh thin leh Journalist ni mek, C. Lalfamkima – Upper Republic, MPCC Secretary lo ni tawh leh John A. Lalnghakzuala, MPCC Secretary ni mekte ZPM Party-ah a lawm lut a.
