Champhai leh Hnahlan winery atanga wine siamchhuah chungchanga Mizoram sawrkarin thu mum nei chiang loa thu inchuh a awm mek laiin, heng winery atanga sacrament atana an wine leisaktu Baptist Church of Mizoram chuan sacramental wine hi a tlachham hnai tawh hle nia sawi a ni a. Society lam nena inremna thuthlung an siam anga an kalpui zel theih nan hma la tur leh ‘aw’ nei turin sawrkar an beisei tih sawi a ni bawk.
Kan thu laknain a tarlan danin, Champhai Grape Growers Society leh Mizoram Baptist Kohhran hian sacrament atana an wine siam inleisak tur hian inremna thuthlung an siam a, hemi ang hian kum engemawzat chu an lo indawr tawh a ni. Sacrament atana wine siam hi tuna dawra an zawrh ang niloin alcohol dal deuh tura siam danglam a ni.
Hetihlai hian sacramental wine chungchangah BCM general secretary Rev. R Lalbiakliana chuan Grape Grower Society-ten a pangngaia grapewine an siamnaah hian sacrament bik tur pawh hi an um tel tho a ngaih avang leh sawrkarin a khap tak avang hian anmahni lam chauh niloin an ni (BCM) lam pawhin harsatna an tawk chu a ni ta ber tih a sawi.
Tun dinhmunah sacramental wine hi an kawl tam tawh lo a, thla hnih – thum daih emaw vel chu an kawl tih sawiin, tualchhung kohhran lamin lak khawlsa te nei ve bawk mah se, Baptisma inkhawm leh kohhran programme dang dangah sacrament ruai thehna tur a awm chhoh nual dawn avangin tuna an kawlsa hi chu eng tham mah a ni tawh lo tih a sawi. Sawrkarin a khap zel chuan buaithlakna a awm dawn thu te, Grape Growers Society lam nen pawh an inbiak thu te, sacrament chu tawp thei a nih loh thu leh kal zel tur a nih thu te Rev. R. Lalbiakliana hian a sawi. “Society lam pawhin sawrkar lama hma an lak reng thu leh an hmalakna lo ngaichang tura min duh thu an sawi a. Society nen hian agreement fel tak neia indawr kan ni a, kum hnih chhung zel atan agreement hi ziah a ni thin. Tunah pawh hian indawr thar leha agreement thar ziah leh a hun dawn hnai tawh nghe nghe a ni,” a ti
Kohhran ang chuan thutlukna engmah siam a la nilo tih BCM general secretary hian a sawi a. Society nen indawrna a la kal reng a, sawrkar hian a phal lo zui reng a nih chuan sacramental wine chu tawp mai thei a nih loh avangin kawng dang an dap ve mai a ngai dawn tih a sawi a ni.
