He hunah hian MPCC President chuan, Manifesto chungchang sawiin, kan sorkar hunah kan ti ang tih lam a ni lo, kan sorkar hma hian keimahni ah kan lantir tur a ni a, kan vei tur a ni a, a takin kan nunpui tur a ni. Sorkar Tha siam hi kan tum tak tak a, hlenchhuah ngei pwh kan tum a ni, tih Mizoram mipuiin min hriatpui se ka duh a ni, a ti.
Sorkar tha (Good Governance)-ah chuan thil tha tih a awlsam a, thil sual tih a harsa thin. Sorkar tha loah chuan hausak a zahthlak a, Sorkar thaah chuan retheih a zahthlak. Mi retheite hausakna tur Sorkar Tha siam hi kan tum a ni a, chu chu kan kal dan tur a ni. Mipui retheih laia sorkar hotute hausak hi sorkar tha lo zia a ni, a ti.
He thu hi Vawiin ni 28.2.2023 (Thawhlehni)a Golden Hall, Congress Bhawan-a kum 2023 MLA General Election neih tura Congress Party Manifesto MPCC President Lalsawta’n a tlangzarhnaa a sawi a ni.
Lalsawta chuan, Chief Minister, Minister leh MLA te hi langsar leh lian takin angin lang mahse sorkar hnathawkten a nihna ang taka an thawh avang zawkin ram hmel a danglam thin, tih sawiin, sorkar hnathawkte hi sorkar kutke ber an ni a. Sorkar hnathawk pension tawhte pension mai tur leh pension mek te tana tha zawk Old Pension Scheme kalpui hi kan tlin a, kan thei bawk. Kum tam tak, Mizorama sorkar hnathawk awm hmasa ber atang vawiin thleng hian Old Pension Scheme hmanga pension vek an ni a, kan tlin reng a ni. Tunah hian new pension atan kumtin nuai 4500 chuang kan hmang reng a. Old pension pawisa pek ngai bawk, new pension atana pawisa sen ngai bawk hi Mizoram tan chuan a hautak lutuk a ni. Tin, Congress Party kan sorkar a nih chuan sorkar hnathawkte hlawh bakah hamthatna hrang hrang – DA, DR, CP Fund leh Penssion Benefits-te hi a hun takah pek an ni dawn a ni, a ti.
Kan ram dinhmun kan hria. Rorelna mumal loah avanga mi sual tlemte inthurualin mi tha ngawi renga awm te rahbehin an awm a. Mizoram hi misual leh pamhamte kutah kan dah dawn lo. Bial tinah Mizoram tana mi tha kan dintir dawn. Sorkar tha siam turin inthlan hma thla 10 emaw chauh awm tawhah sum hmanga thlemna leh tawktarh dang te do tur leh hnawl turin Mizoram mipui ka ngen a ni, a ti bawk.
Manifesto No. 2 a Sorkar Tha siam dan tur tarlan tlangpuite chu : Corruption awm lohna sorkar, Dan rorelna (Rule of law), lang tlang sorkar (transparent government), Thuneihna sem zai ngam sorkar (decentralisation), Smart Government leh Sorkar viak tha leh mipui rin ngam tihte a ni. Congress Party-in sorkarna a siam a nih chuan a chunga sawi ang Sorkar Tha hi siam ngei kan tum a ni.
Manifesto No. 2 tlangzarh inkhawm hi Ronald Sapa Tlau, Vice Chaiman, Manifesto Drafting Committee in a kaihruai a, Zothangliana’n Hunserh a hmangin C. Lalhriatpuia, Secretary, Manifesto Drafting Committee-in Manifesto No.2 Powerpoint Presentation nen a sawifiah bawk.
