Vawiin khan MPYCC chuan thuchhuah siamin,, “Kum nga dana Mara Autonomous District Council (MADC)-a Member of District Council (MDC) inthlan pui neih thin chu May ni 5, 2022 khian neih a ni leh dawn ta a, Mara rama inthlan pui neih turah hian sorkar tha leh mipui sorkar a din theih nan Congress Candidate-te vote turin MADC huam chhunga mipuite chu kan ngen tak meuh a ni,” an ti.
Thuchhuah ah chuan, “Congress party hian MADC-ah pawh hian rorelna kan lo chang tawh thin a, term hmasaah hneh takin chakna kan lo chang tawh a, Mara ram mipuiin Congress party-ah rinna an nghat thin a ni. Congress-a rinna lo nghat thintu Mara mipuite chungah lawmthu kan sawi nghal a. Mara ram mipuite hnenah Congress party-a rinna an lo nghah thinna chu nemnghet leh ngei turin kan ngen.
“MPCC hi President thar Pu Lalsawta hovin kan in tuai thar mek a, Sorkar ṭha a awma mipuite dikna chanvo humhalh a nih theih nan kalphung tha leh dik, “That Loh Theih Lohna Bawm” kan aupui mek a, chu chu a takin Mara ramah pawh hian thlentir kan tum bawk.
“Kristianna lama entawn tlak tak leh Kristian nunphung dah pawimawh em em ; Mara mipuite tan hian India rama Kristian nekchepa Hindu lal ram din tumna lama sawi hlawh BJP te hi tunah hian na taka hnawl ngam turin kan ngen a. BJP hi Mara ramah an awm ngai lo, tun term kal meka Congress MADC-te hi MNF party hian sawiṭhiah tumin hma an la reng a, an mangangin BJP an zawm ta ringawt a ni. Chuvang chuan Mara mipuite hian BJP candidate vote hi an bat a ni lo.
“MNF hi state-ah an sorkar apianga Autonomous District Council (ADC) sorkar dinglai tihbuai ching an ni a, hei vang hian ADC pathum kan neihte hian sorkar nghet an neih loh phah thin. ADC hmangaihna nei lotu MNF party hi kan hnawl ngam a hun, Mizoram dinhmun enin sum a harsa em em a, sorkarna chelhtuten mipui hmai eng zah zo lovin eirukna a hluar a, ram hruaitu lu ber pawhin a pawisa kawl ‘ka ta’ a tih ngam tawh lohna dinhmunah kan ding mek a ni. Hetiang dinhmuna ding mek mipuite hian MNF hi kan hnawl ve a hun tawh a ni,” an ti bawk.
