Vawiin ni 29 April, 2024 (Thawhtanni) hian ZPM General Headquarters office, Aizawl ah chhung inkhawm an nei a. He huanah hian Professor Lalnilawma, Minister-in thu a sawi a ni.
Prof. Lalnilawma chuan, “Tunlai hian Mizoram hmun hrang hrangah tui harsatna kan tawk mek a, hemi sukiang tur hian theihtawp kan chhuah a, Department lam pawh an hah thin hle a ni. Chhun leh zan leh zan zawmin Pathianni pawh sawi hleithei lovin rim takin hna an thawk thin a ni. Kan lui tui tlante kan duat a ngai a, tunlaiin mi thahnemngai ten kan lui dungte thian faiin an hnatlang thin a, mipuite pawh kan bawlhhlawh paih danah fimkhur leh zual kan ngai a ni. Tui hi kan nunna hnar a ni a, kan luite a lo thianghlim zawk nan bawlhhlawh kan sawngbawl danah pawh hian mipui ten hma kan sawn angai takzet ta a ni,” a ti.
Prof. Lalnilawma chuan,” Zoramah Politics thianghlim zawk kan tun nun theih nan in sawisel hmasa ngawt lovin thurawn tha zawk in pe tam ila, lehlam party an nih avang mai a sawiselna tur zawn ringawt hi a fel lo va, sawrkar thawhpuitu khua leh tui tha tak ni turin mipuite kan insawm nawn leh duh a ni,”a ti bawk.
Minister chuan,“Pathian leh mipui te khawngaihna zarah Minister dinhmunte kan luah ve a, he dinhmun kan luah atanga kan thil hriat tam ber chu ‘mamawh kan lo va ngah tak em’ tih hi a ni. Nitin maiin dilna a lo lut reng a, hei leh chen kan ram inrelbawlna kan lo kalpui tawh a, mipuiten mamawh kan la ngah em em mai hi eng nge a chhan tih hi ka zawhna a ni. Mamawh zawng zawng erawh in pek vek a harsa ang, mipui nawlpuiin kan nitin khawsakna leh kan eizawnna kawnga kan mamawhte a tam thei ang ber in phuhruksak hi sawrkar mawhphurhna a ni a, mipui te tana theihtawp chhuah hi kan tih tur dik tak a ni. Khawtlang hruaitu leh khaw tual mi ten khawtlang hmasawnna tur thil kan thawk a, them lem deuh mai a kan thawk thin hi chu a fel lo a, khawtlang tan chauh ni lo ram ro tling tur kan thawk a nih chuan a tha tur a ni,”a ti bawk.
Prof. Lalnilawma chuan,“ZPM sawrkarah chuan kan hna a tha tur a ni a, kan hnathawh a tha tawk lo a ni pawhin mipuiten min sawisel tur a ni. Kan in en let anga, kan siam tha leh tur a ni. A tha zawnga in sawisel hi chu mi tupawhin kan pawm thiam vek a ni,” a ti a.
“Tun hnaiah kan party mi leh sa thenkhatin hna an han thawk ve a, mi thenkhatin departmental work-ah work supervisor an ruat ti ang zawng ten min sawisel a, min sawiseitu te hian an lo tih dan vek a ni, a thawktu ni lovin an hna thawh hi kan en zawk tur a ni a, a tha lo a nih chuan kan sawisel mai tur a ni. Politics a nih avanga thudik chanve hmanga in beih te hi tawp se la, kan ram leh hnam tana tha turah chuan inlungrual takin hna thawh ho puiah opposition lam pawh ka sawm duh a ni,”a ti bawk.
