Vawiin ni 30.11.2022 (Nilaini) hian South Tuipui Block pathum Special Meeting neih a ni a. MPCC President Pu Lalsawta leh MPCC Vice President Pu Lal Thanzara ten an hman pui a, MPCC President Pu Lalsawta chuan 2023 MLA General Election-a South Tuipui bial Congress Party Candidate atan Pu Er. C. Laldintluanga, Hnahthial Model veng a puang.
MPCC President Lalsawta chuan, dik lo taka pawisa ngah hi phurrit mai a ni a. Sorkar siam leh tlin tuma hmâna tih dan ṭha lo chhawm hi kan hnualsuat a ngai, tih sawiin, hmâna tih dan aia ṭha zawk, midang te leh ram tana thil ṭha zawk siam hi kan tih tum a ni a. Congress party chuan ram chhe zel tur dinhmuna a din kan rem ti lo. Kan tu leh fate tana ram ṭha leh nuam zawk din hi kan tum ni, a ti.
Pu Lalsawta chuan, duhthlanna fim tak Pathianin a pek ram mipuiin a hman hi Congress party duh dan a ni a. Sum leh pai hmanga mipui lei theiha ngaihna hi Congress chuan kan dodal zel dawn. Pawisa hmanga in lei tir hi ram hralhna a ni a. Lal Isua thisen chauha lei kan ni a, Candidate leh Political party ten lei theiha an ngai che u a nih chuan i zahawmna humhim tur leh sorkar ṭha siam tura lo dodal turin ka ngen che u a ni. Kum khat chhung chauh huaisen taka kan in sum hian ram rorelna ṭha min pe thei a, ram leh hnam tan huaisen tura intiam turin ka ngen che u a ni. Hunin thil ṭha ti turin min nawr, ramin min hmuak bawk. Sum leh pai hmanga inthlem dodal hi Kohhran, MPF, Election Commission te duh dan a ni, a ti bawk.
Pu Sawta chuan, kum 2023 inthlanah Congress Party hi kan mal ṭan dawn lo, dik leh fel taka kan tih chuan Pathianin min pui dawn tih hi kan ring ngam bawk. Congress kan sorkar chuan hlemhlêt duh mahse an hlemhle dawn lo, ei ru turin chance an nei dawn lo. Thusawi hlimawm leh nuihzatthlak ka sawi thiam lo, ka sawi theih erawh Mizoram damdawi a ni. Sorkar ṭha siam kan duh avang leh thluaka sum lut laka fihlim kan duh avangin Candidate kan puang zawih zawih lova, kan fimkhur a ni. Chutiang turin South Tuipui bial hmasawnna hnathawk tur leh dikna luipui luantir turin Pu Er. C. Laldintluanga, Hnahthial Model veng hi kan puang a ni, a ti.
Pu Lal Thanzara MPCC Vice President pawhin thu sawiin, Congress Party-a haw runpui a thleng mêk tih sawiin, mi ṭha tak takin Congress an zawm mek zel a. Ram leh hnam hmasawnna hnathawk tura mi ṭha kan sawm te pawhin kan Chief Ministerial Candidate Pu Lalsawta an enin zui tlak leh zui atana an duh a nih avangin an hnar ka ring lo, an lo tel ve thuai kan beisei, a ti.
Pu Lal Thanzara chuan, Chief Minister a lo lan apianga nuih tumna hri leng tih reh hi a ṭul tih sawiin, Kamrula te hovin Cabinet Minister nih theihna chance an neih sân em emna party hi Mizoram mipui tan pawm reng chi a ni lo, a ti.
ZPM chungchang sawiin Pu Lal Thanzara chuan, mahni party din pawh chhuahsan zel duh, mi nghet lo, an hotu tam zawkin a mizia an hriatchian em avangin Chief Minister atan meuh chuan an pawm thei loh, an Party boruak siam nan leh tih nun nan Chief Minister atan an zuar der mai mai a ni a. Mak takin Chief Minister lo ni ta se, party dang aiin ZPM party mite hian an ning zawk ang. Mahse chu chu a thleng lovang, hmun hrangah ZPM party hruaituten ZPM aia Congress party an thlan zawk zel tak avangin, a ti bawk.
South Tuipui bial MLA Candidate atana puan tak Pu Er. C. Laldintluanga pawhin thu sawiin, Congress, MNF leh PC Ministry ka hrawn vek tawh a, Remruatna fel, sorkar inrelbawlna fel tak nei ṭhin chu Congress sorkar a ni, tih sawiin ruling lai ni lo, oppostition an nih laia Congress party ka zawm thei hi ka lawm zual, a ti bawk.
Pu Dintluanga chuan, ram tana zau zawka rawng bawl theihna hun ka neih bul ṭanna ni ah hian bial mipuite thurawn engpawh dawngsawng tura a inpeih thu sawiin, tuna Congress party hmalak mek dan leh Congress Party President Pu Lalsawta rintlakna leh dikna hi zui tlak, zui tur dik niin ka hria. Inrelbawlna ṭha lovin a nghawng rapthlak zia ka hria, Pu Lalsawta hi a lehkhabu ‘Ṭhat loh Theih Lohna Bawm’ avangin ringawt pawh hian Mizoram mamawh a ni, tih sawiin, ram leh hnam tana hna ṭha pawh thawk thei lova, an mahni thlangtute mitmei pawh veng eih lova hotute tlawna hun khawhral turin Congress party hi ka zawm ve lo. Mipui damna, himna, hmasawnna leh thlamuanna pek hi ka tum a ni, a ti bawk.
