Aizawl, April 21 : Sports & Youth Services changtu Minister Pu Robert Romawia Royte chuan vawiin khan Vanapa Hall ah Govt. Mizo High School Annual Sports kharna hun an buatsaih chu khuallian niin a hmanpui.
Pu Robert Romawia Royte chuan Govt. Mizo High School chu sikul hlun leh ropui a nih thu sawiin he sikul hi Mizo hnam timawitu leh tihmingthatu a ni a, kawng tin renga sikul hmasawnna chu Sawrkar in a ngaipawimawhin theihtawp a chhuah mek tiin a sawi. Sports leh ICT Department kaltlangin a theih ang angin sikul tihchangtlun a tum thu a sawi lang bawk a ni. Govt. High School field cheithat tum dante sawiin hetiang hi sikul dangin an nei lova in vannei hle a ni, a ti. Field ah phul lem phah anih tur thu te, a sira dawhsana mihring tlanna tur ‘elevated jogging track’ leh thil dangte pawh dah anih tur thu a sawi.
Minister chuan social media a lar hnuin a chhe zawng leh hrisel lo zawnga thil sawi an tam nia a hriat thu sawiin hei hian Mizo society ang, society thangmekah nghawng tha lo a nei thei a, kan sim vat a tul hle a ni, a ti. Zirlai naupangte hnenah an thu leh hla an hriatna te chu finfiah a pawimawh a tul thu sawiin, thu hriatna source a dik loh chuan ngaihdan diklo a put tir thei che u a chuvangin lehkhabute, chanchinbute leh TV atang tein thu dik hi hriat tumin hengte hi chhiarin en tam thin ang che u tiin chah a ni.
Sports Minister chuan zirlai naupangte chu nu leh pate neihsa atanga hlawhtlin aiin mahni tumruhna leh thawhrimna atanga hlawhtlinna neih hi a ropui leh a hlu zawk tiin tunlaiah hmanlai aiin zirtur leh hnathawh tur hrang hrang a tam tawha mahse hengah te hian a nachang hriat a ngaia, a nachang hria te tan chance a tam tiin zirlai naupangte chu tumna sang nei turin a fuih a ni. New Education Policy 2020 hnuaiah sports leh physical activities chu co-curricular activity ni tawh lovin curricular activity ah dah a nih thu sawiin hei hian zirna a ti nuam dawn nia a rin thu a sawi lang bawk a ni.
He hunah hian Govt. Mizo High School Headmaster Pu Hmingchungnunga’n inlawmna thu a sawi a. Annual Sports hi kar hmasa chhungin sikulah an nei a, report tawi chu Pu C. Lalhuliana’n a sawi a ni.
Govt. Mizo High School hi January ni 15, 1944 khan din niin Assam Board permission chu 1948 ah an hmu a, hemi hnu 1953 ah Sawrkarin a la a ni. Tunah hian zirtirtu 41( a nget 27) awm mekin tun academic session 2022-23 ah zirlai naupang 902 an nei mek a ni.
