Vawiin khan Sports & Youth Services Minister Pu Robert Romawia Royte chuan Govt. T. Romana College Library hawngin, he hunah hian khuallian a ni a. Govt. T.Romana College-a NCC ten he hunah hian khuallian hi Guard of honor an lo pe a ni.
Minister Pu Robert Romawia Royte chuan Govt. T. Romana College-a thawktute sawmna duhawm tak avangin lawmthu a sawi a. College Enrollment nei sang tak leh College campus vawn that leh thing leh mau humhim kawngah entawn tlak a tih thu a sawi a. Minister chuan zirna tha tehna hrang hrang zingah admission hmuh that leh pass tir chhuah zatah thui tak a innghat a ni a ti a. Mizorama chhungkua hrang hrangin hma kan sawn dan ngaihtuah hian Missionary ten an lo zirtir chhungkaw member pakhatin an tu leh fate khawsak rel, an eizawnna leh hmasawnna a hril a ni tih tunhma Mizo lehkhathiam chhungkuaah chiang takin vawiin hian kan hmu a, mi pakhat lehkhathiam hian an chhungkaw kual leh an thlahte hlawhtlinna a hril a ni a ti a. Retheihna hian zirnaa hlawhtlinna a dal lo tih hi kan vawng reng tur a ni a ti bawk. Vawiin a Mizo zinga mi hlawhtling kan chhui hian a chiang em em a, nuam sakna chhiat phah, hausakna chhiat phah an awm an awm bawk tih hre rengin, harsatna leh retheihna kan tawh te hi min khalh ngiltu leh harsatna kan tawh te hmang tangkaia chhel leh hlawhtling tura beih fan fan hi zirlaite rilruah intuh se a duh thu a sawi a.
Minister chuan khawvel changkannain a ken tel social media hman thiam leh hman tangkai thiam a pawimawh tak zet a, social media kal tlangin thu tam tak kan chhiarin kan sawi thei a, tunlai hian a bikin hmeichhe thenkhat aiin mipa thenkhat ten social media-ah tawngkam hman an uluk lo tiin, thalai zirlaite, heng kawngah hian fimkhur turin a fuih a ni.
Govt. T. Romana College Library hi Construction of Infrastructure Development of Govt.T.Romana College, Aizawl tih hnuaia sak a ni a. Building sak lungphum hi August ni 18, kum 2018 khan Pu Lalsawta, Minister in a phum a. Lushai Engineers in March ni 5, kum 2019 atanga hnathawh tan a ni a, October ni 25, 2021 khan zawh a ni a. Floor pali awmin, a vai zau zawng hi 12821.11 Sq ft a ni a, a vaia sen hi NEDP atangin Cheng nuai 320 a sak a ni. Kumin hian kum 30-na Pearl Jubilee an hmang mek a ni.
He hun hi Department of Economics HOD Pu R. Lalremliana’n a kaihruai a, College Principal Dr. Jenifer Lalbialdiki hnen atangin thusawi tawi ngaihthlak a ni a; Prof. Malsawmliana, Secretary Infrastructure Committee hnen atangin technical report ngaihthlak a ni bawk a. Pu C. Laldinsanga, Chairman Infrastructure Committee in lawmthu sawiin he hun hi a khar a ni.
Chawhnu lamah Pearl Jubilee lawm chhunzawmna college campus-ah neih chhunzawm niin Thingpui ruai bakah Music Society kaihhruaina hnuaia zai leh cultural programme-a hun hman a ni. GTRC-ah hian zirlai 1498 an awm a, zirtirtu 36 awmin office staff 16 an awm mek a ni.
