Aizawl, the 22nd March 2022: Nimin ni 21.3.2022 Thawhtanni khan Sports Minister Pu Robert Romawia Royte chuan Lengpui MSSC Sports Complex-a Synthetic Astroturf Football Ground chu a hawng.
He Football Ground hi Rs 500 Lakh Khelo India Scheme, Ministry of Youth Affairs & Sports atanga sum dawn hmanga sak a ni a. Ni 19.6.2020-ah sak tan niin Covid 19 hripuiin harsatna thlen mahse ni 27.10.2021-ah sak zawh a ni. A dung 110 mtrs niin a vang 74 mtrs a ni a, a sirah Paver block remkual chhuah niin hung vek a ni a. Pavillion sak niin players changing room 2 a awm bawk. Compound light system dah a ni bawk.
He huna khuallian Sports Minister Pu Robert Romawia Royte chuan Mizoram District Headquarters thar 3-ah Phullem phah tharin district headquarters zawng zawngin phullem an neih vek tawh bakah khaw dangah te pawh siam mek zel a ni a. Lengpui chu District headquarters nilovah chuan Football Phullem Field siam hmasak berna a nih avangin mipuite a lawmpui thu sawiin khaw thenawmte leh sikul hrang hrang te pawhin chhawr tangkai se a duh thu a sawi. Sports Minister chuan infiamna leh taksa sawizawi chu National Education Policy 2020-in zirnaah a puan tawh avangin zirna in te pawhin infiamna an uar vek a ngai tawh a, nasa lehzuala sports facilities siam a tul a ni a ti.
He huna Khualzahawm Bialtu MLA Er H.Lalzirliana pawhin a ngenna leh Lengpui mipuite ngenna ngaipawimawha Lengpui khuaa phullem field siam a ni chu lawmawm a ti a. Lengpuia Phullem phah avang hian Mizoram sorkar sum a hek lova, GST leh Labour Cess atangin Mizoram sorkarin sum tam tak a hmu zawk a ni a ti.
Pu TC Pachhunga, Ex-MLA leh SEDP Board Vice Chairman pawhin thusawiin, Mizoram hmun hrang hrangah sports hmasawnna ruhrel siam a tam hle a, thalaite mamawhna hriain Sorkar chuan a siam zel dawn a ni a ti.
He Function-ah hian MSSC hotute, MFA hotute, Lengpui VC leh NGO hruaitute an tel tha hle a ni. Field thar lawmna a Lengpui Football Veterans te leh Aizawl E-II Football Veterans te inkhel chuan mipui hlut a hlawh hle.
He function-ah hian Dr Lalrozama IAS, Secretary, SYS Deptt-in a kaihruai a, John Tanpuia MCS-in Technical Report a pe a, Lengpui VCP Pu Lallawmthanga’n khawtlang aiawhin lawmthu a sawi a. Pu Joseph H.Lalremsanga, MCS, SYS Director-in lawmthu a sawi a ni.
