Darzo khua, Liandala Run a neih mek Mizo Zirlai Pawl (MZP) Assembly vawi 66-na hun thumna Vantlang Inkhawm chu vawiin khan Sports & Youth Services, Tourism etc changtu Minister Robert Romawia Royte in a hmanpui. Assembly thupui hi “Zirlaite – Zofate leh Zoram tan” tih a ni.
Vantlang inkhawm Lalremruata Hlondo, NESO Coordinator kaihhruaiah Robert Romawia Royte chuan zirlai kalkhawmte chu Assembly chibai bukin MZP Assembly chu kawng hrang hranga zirlaite ti phur thartu leh chona thar siam saktu anih ngei a beisei thu a sawi a. Zirlai pawlte chu ram leh hnam humhalh kawnga huaisen taka pen chhuak thin tu leh thalaite hmakhua ngaia thahnemngai taka hma la thin tu an nih angin Mizo mipuiten kan ngaih hlut thiam a pawimawh takzet a ni, a ti bawk.
A sawi zelnaah Sports & Youth Services Minister chuan “Ruihhlo in kan ram nasa takin min tibuai a, a bik takin mipa in nunna an chan phah nasa hle a. Tun dinhmunah mizo mipa kan tlem tial tial a, electoral roll ah pawh kan tlem zel hi a veiawm takzet a ni” tiin thalai rual kalkhawmte chu ruihhlo laka fihlim tur leh a do kawnga mahni zawn theuha ke pen turin a chah a. Nationalism a ngaih pawimawh thu pawh sawiin khawvel changkang chho zelah keini pawhin kan hnam ah leh kan nihnaah kan chian a tul a, MZP thiltum pawimawh tak Mizo Hnam nun zemawi leh tha apiangte humhalha chawisan chu kan mawhphurna pawimawh berte zing ami a ni, a ti a. Zofate inpumkhatna chu sawrkarin a ngai pawimawh takzet a ni tiin hemi kawnga hmalakna lian tak Zo Kutpui pawh neih leh tum anih thu a sawi a ni.
Vantlang inkhawm ah hian Rev Lalronghaka’n hunserh a hmang a. Lalnuntawma Fanai, Adviser, MZP chuan thupui sawina hun a hmang a. Zirlaite chu Mizoram hawiher thlak theitu an ni ti hriaa ram leh hnam hmasawnna tura ngaihtuahna seng tak tak tur leh politics-te ngaihvena party hrang hrang manifesto-te pawh zirchiang thin turin a chah a. MZP hruaitute chu an hmachhawp hrang hrang ti hlawhtling tura rim taka hna an thawk thin chu chhuanawm a tih thu sawiin kuthnathawh uar leh chawisan kawngah hma la chhunzawm zel turin a chah a. Competitive exam piah lamah thalaite tan eizawnna tha tak tak a awm a ni tiin zirlai kalkhawmte chu an thiam zawng leh an tuina lam taima taka luhchilh turin a chah bawk a ni.
MZP Assembly Vawi 66-na hi nimin October ni 25,2022 ah bultan niin nizan khan Palai Lawmna Inkhawm neih a ni a. Palai 800 chuang telin tukin khan palaite hian Darzo khua ah faina hnatlangpui an thawk a ni.
Mizo Zirlai Pawl hi October ni 27,1935 ah din niin pawl thupui chu “Tanrual hi chakna”tih a ni a. Tun dinhmunah MZP hnuaiah Headquarters 13, Sub-Headquarters 47 leh Branch 102 a awm mek a ni.
