Aizawl, April 9 : Mizoram chhunga skill development chak taka kalpui tura din Mizoram State Skill Development & Entrepreneurship Mission (MzSSDEM) hnuaia State Executive Committee (SEC) chu nimin khan SAD Conference Hall, MINECO-ah a vawikhat nan an thukhawm a. SEC member-te hi skill development lama hmalatu sorkar department 14 a Director te bakah University aiawh, Industry neitute aiawh leh Training Provider-te aiawh pakhat theuh an ni.
Pu Lalramsanga Sailo, Secretary, Labour,Employment,Skill development & Entrepreneurship ( LESDE) Department, State Executive Committee Chairman ni bawk chuan meeting hi kaihruaiin Mizorama skill development chak taka kalpui a nih theih nan member-te rilru inhmu tlanga hma lak ho a pawimawh a, skill training hmanga mihring hman tlak chher chhuah hi mimal leh ram din chhuahna bul, ram hmasawnna hnuk pawimawh tak a nih thu a sawi a.Hemi kawnga thawktute nasa leh zuala inpekna leh thawhhona a ngai ani tiin kalkhawmte a fuihin a chah a ni.
Pu Lalmuanawma, Deputy Director, LESDE Department chuan power point presentation hmangin National Skill Development Mission hmanga India-in skill development lama hma nasa taka a lak thute, Mizoram Skill Development Mission hnuaia committee hrang hrang leh an mawhphurhnate a sawi fiah a. Mizoramah hian sawrkar department 14 vel leh pawl, mimal engemaw zatin inhre tawn lo a skill development an kalpui thu leh hmalak dan inhre pawh tlang veka thawh ho a tul thute a sawi bawk.
Mizoram chhunga skill development programme hrang hrang baseline survey LESDE Department chuan a nei a, survey atanga an thil hmuh/hriat-te a bu a siam chu committee in an enho a. Member-te chu skill training kalpuinaah, State in a mamawh dan a zir a National Skills Qualifications Framework (NSQF) aligned courses thlan thiam theih nan NSQF nih phungte hrilh hriat an ni a, State Executive Committee pawimawhna leh mawhphurhna inhrilh hriatna hun neih a ni bawk.
Mizoram Skill Mission Portal, LESDE Department leh Mizoram State e-Governance Society (MSeGS) hmalakna a buatsaih mek chu he meeting-ah hian demonstration neih a ni a. He Portal hi skill development khawihtu department hrang hrang ten an training kalpuite data an record-na tur leh, awlsam zawka khaikhawm (evaluate) leh monitor theihna tur niin, Skill India Portal nen pawh a inthlun zawm tura duan a nih thu report a ni.
Member kal khawmte chuan mahni department hnuaia (Central & State sponsored) skill training kalpui a nih dante an report a, hmalak chhoh zelna atana tha nia an hriat te sawi ho a ni. Pu K Lalhmingliana, Director, LESDE Department chuan thurel tur a sawi hawng a, Dr. JT Vanlalngheta, Joint Director, LESDE Department in lawmthu sawiin hun a khar a ni.
