Aizawl, May 9 : State Level Sub Committee on Green Mizoram chu chawhnu khan an Chairman leh Environment, Forests & Climate Change Minister ni bawk Pu TJ Lalnuntluanga, kaihhruaina hnuaiah Green Mizoram Day 2022 hman dan relin SAD Conference Hall MINECO ah an thukhawm.
Minister Pu TJ Lalnuntluanga chuan hripui a kiam deuh tak avangin kuminah Green Mizoram Day chu mumal taka hman tum a nih thu a sawi a. Mizoramah mai ni lo khawvel pumah tui hna te a kang chat chak hle a, tuihna kan tihpun loh chuan hun lo kal zel turah tui kan harsa viau thei niin a lang a, hemi pumpelhna tha ber chu tuihna te a lo pun nan thing phun uar a, lui hnara thing leh mau cheureu tur ven leh humhalh a ni, a ti.
Meeting chuan kumina Green Mizoram Day hman naah tuihna humhalh leh tihpun nan thingphun uar a tulzia chu zau thei ang berin awareness programme hmangin mipui leh zirlai ah te inzirtir ni se an ti a. Meeting chuan kumina State Level Green Mizoram Day programme Ceremonial Tree Planting chu Aizawl a Tlawng kam hmun remah hman ni se an ti a. DFO tin ten lui hnar leh tui hna tihpun nan lui kamah thing phunna ceremonial planting chu neih ni se tiin an rawt a ni. June ni 11, Green Mizoram Day chu Inrinni ah a tlak avangin, June ni 10 Zirtawpni ah programme hman ni se tiin meeting chuan a rawt a. Kumin a thupui atana ‘Thingphun la, tui hna siam rawh’ tih chu rawt a ni bawk.
Sub Committee rawtna te hi State Level Committee ah chhawpchhuah leh tur a ni a. Vawiin meeting ah hian PCCF & Secretary Environment, Forests & Climate Change Pu Jitender Kumar leh a thawhpui te, Department thenkhat aiawh te bakah NSS, ASEP, SENVA leh Green Mizoram Network.
