MPYCC chuan thuchhuah siamin, “Mizoram Chief Minister Pu Zoramthanga’n Manipur Chief Minister Biren Singh nena an inbiak thu a tarlanah hian; kan Chief Minister berin Manipur-a Zofate himna lam a sawi ri lo hi a zahthlakin a pawi kan ti.
“Nimin June ni 18, 2023-a CM Instagram lama thu puanzarah khan State pahnih Chief Minister inbiaknaah Manipur-a Zohnahthlak himna sawi lan a ni lo a. Manipur CM erawhin Mizorama Meiteite himna sawipuiin, Pu Zoramthanga hian an himna pek a tiam mai bakah Manipur leh Central Sorkar hmalakna chu thlir reng chungin an hmalaknate a thlawp thu tarlan a ni.
“Manipur dinhmun diktak khawvel hmuha pholan a nih mêk avangin Zohnahthlakte laka Meitei chetna dik lo tak puanzar a ni chho zel a, hetih laia kan CM thu leh hla tlanchhe aw tak mai hian mangangte a thlamuan lo a ni.
“Meitei ṭhalai ten Assam ram thlenga Mizoram châk lakluhna dan pina min vau laia, mahni state leh Zofate thlavang hauhna pakhat pawh kan CM-in a chhak chhuak ve lo hi demawm kan ti tak zet. NEDA lama a thurualpuite an nih vanga mahni state mipuite leh state danga Zohnahthlak-te thlavang hauh ngam lo CM hian tui aiin thisen a chhah zawk tih hre rawh se,” tiin an tarlang.
