Vawiin khan BJP spokespersion Lalremsangi Fanai chuan Aizawl Press Club-ah press conference neiin, “Covid-19 hrilengin min tuam a, India ram chhung leh pawn a Mizo Thalai hnathawkte kan tlanchhe haw anih kha. Tunah, Nunphung pangngaiin khawvel a inherrem mek a ni. Mizote pawhin State pawn leh ram danga eizawnna hlawk tur nia ngaiin, chhungkaw harsatna vang liau liauin, Awmpui Hna (House-maid) thawk turin ram chhung leh pawnah tam tak an kal leh tawh a. Tam tak an talbuai a, an thiamlohna lam sawi lo a chhanchhuaha hruai haw turin theihtawp kan chhuah tur a ni,” a ti.
BJP thupuangtu chuan, “State pawn, ram pawna hna hnuaihnung thawka Mizo inhlawh tura kalte hi helaiah Agent-te kawhhmuh leh a hmuna lo kawhhmuhtu eizawn nana hmang awm leh chhawng an ni. Tuna Dubai, Oman, Syria vela Mizo hmeichhia buaina tawk mekte tirtu leh kawhhmuhtu Dubai hmuna Agent pawh Burma mi-Zo hnahthlak a ni.
“Ram pawna hnathawkte dinhmun theih chin chinah kan zirchianga, hna lo kawhhmuhtu (Mizoram a Agent) an Passport leh Tourist Visa vel lo buaipui a, hnathawktute thawhchhuah atanga eizawnna kalpuitute hian Security an pe lo a. Ram thenkhat hian an ram chhunga hnathawktute Security an pe tha lo hle bawk. Chutih karah India Passport leh Visa nei lo, Work Visa nei lo, dan bawhchhe nghalin mi ramah kan lut a, kan intir lut a. Harsatna tawk thin ten anmahni pui turin National Party Mizoram BJP te min au fo thin a ni. Keini’n a tul angin Home Ministry, External Affairs Ministry, India Embassy, Mizoram sorkar, DGP, DC te hnenah thlenin, tanpui theih dan kan zawng a, Central sorkar, Mizoram sorkar, Party leh mimal zarah mi engemaw zat chuan dam takin Mizoram an lo kir thei a ni. Tuna harsatna tawk tam takte pawh an lo haw theih ngei kan beisei, an mahni leh an chhungte pawh thlamuang taka awm turin Media mite kaltlangin kan chah e.Mizoram Police SP Aizawl,SP(CID) ah FIR kan thehlut ang.FIR thehluh ngai khawp in an manganna hi a thuk a ni.
“Mizote harsatna tawh tamna ram Dubai Mizo Welfare hruaitute pawhin hetiang mite hi an lo buaipui fo a, “ Hnathawk tur hian, tumah lo kal tawh lo rawh u” an rawn ti fo tawh a. Tuna harsatna tawk mekte ngei pawhin “Tumah kal tawh lo rawh se, a hrehawm lutuk, America rama Bawih tihtawp tawh thlentir lehna a ni” an rawn ti hial. Heng thu hi Mizo mipuite, Chhungkaw tinah inzirtir ila, state pawn leh Ram pawna hnathawk tura kal kawngah fimkhur ila kan duh a ni. Mizoram leh Zohnahthlak khawiah pawh Awmpui tel lovin chhungkaw tam tak kan awm thei lo. Tualchhhungah Awmpuite hlawh tha deuh minimum Wages state sorkarin bituk siam a, hna neilote tan hna tam tak kan siam belh a ngai.Hei hi BJP tel Sorkar thar a kan hmalakna hmasa tur a ni,” a ti bawk.
