Vawiin March 29, 2023 ( Nilaini) hian PC.Party President Pu Vanlalruata chuan Mizoram sawrkar sum chèt dan mak a tih thu thuchhuah (Press Statement) siamin a tarlang.
Vanlalruata chuan, ”Thilmak leh maklo hi a thlirtu a zir a ni a. Kan ram sum dinhmun hi mak ka tih fo laiin mak ti lo an awm bawk a; Kum 2020-21 a ral chiah, March 31, 2021 khàn Reserved Bank Of India (RBI) -a Mizoram account-ah cheng khat mah awm lovin cheng vaibelchhe 123.35 indaihlohna kan nei (-123.35 cr) a. Hetianga RBI-a minus kan nei hi kum thara harsatna min siam chiamtu a ni thin, ” a ti a.
Vanlalruata chuan, ”Chutihlaiin, hemi ni vêk, March 31, 2021 hian Mizoram sorkara sum khawihtu officer (Drawing and Disbursement Officer) 709 kan neih zînga 285 chuan an savings/current account-ah pawisa tam tak tak an kawl a. Heng an kawl hi belhkhawmin cheng vbc 456.59 a ni.
”Hetianga sum khawih kual hi thil hlauhawm tak, corruption kawngkhar zâu taka hawngtu a ni,” tih sawiin, Pu Ruata chuan, ”Sorkar hian hetiang kal dan hi titawp se kan thatpui zawk ka ring tlat a ni, ” a ti bawk.
