Vanlalhmuaka, BJP State President chuan, “Covid-19 avangin Mizoramah sum harsatna a awm lova, sum enkawl thiam loh avangin Mizoramah sum hi kan harsa ta zawk a ni,” a ti.
BJP Mizoram Pradesh chuan vawiin khan an party office-ah mithar lawmluhna leh thusawina hun hmangin, “A ni telin Made in India leh Make in India hi Mizoramah hian a thleng mek zel a. Lungleia Municipal Council Election lo awm turah pawh BJP Mizoram Pradesh chuan campaign kick off 27th September, 2022 hian neih a ni ang,” a ti.
Vanlalhmuaka chuan, “BJP Sorkar Pu Modia kaihhruai chu mahni thu tiam a dinghet, miretheite lam tang leh ngaihtuahtu a nih thu Mizoramah pawh mipuiin an hre chho zela, hmun tinah BJP chuan nasa takin hma kan sawn zel a ni. kum 2023 chu BJP tela sorkarna a piang tawh ngei dawn a, a pian tirtu tur pawh Mizo mipui leh Mizoram mipuite kan ni dawn a.
“PMAY Gramin/ Mirethei Insak tanpuina chungchanga Mizoram sorkarin a sum dawn atanga 40% chauh a la pe chhuak leh 60% dang chu a rang lam pe chhuak thuai turin Pu Zoramthanga kaihhruai sorkar chu kan ngen a; Central Minister hmalakna avanga tun hnaia Mamit District huam chhunga PMAY pawisa pek chhuah a awm ta chu BJP Mizoram Pradesh chuan lawmawm kan tiin, Pi Sadvi Niranjan Joyti, MoS chungah pawh lawmthu kan sawi a ni. Hei hian Made in Mizoram sorkar leh Minister te aiin, Made in India sorkar leh Minister ten Mizo te hmakhua an ngai zawk tih a ti lang chiang hle a ni,” a ti.
Lengpui Airport chungchang sawiin, Lengpui Airport state sorkar kuta awm chu kan CM Pu Zoramthanga chuan engtikawng mahin AAI kutah kan hlan thei lo, India ram state zingah Airport nei awm chhun kan ni ti a Mizoram mipuite hmaa a sawi lai mekin, tun hnaia Mizorama lo zin kan Union Minister chuan Lengpui Airport chungchangah hetiang hi min rawn hrilh dan chu a ni ta, “Under lengpui, State Government has requested AAI to take over Lengpui Aiport. Draft MoU has been forwarded to the state Govenment.” Kan state sorkar hian kan Airport pawh chu enkawl zo lo in a lo surrender der tawh tihna a ni. Hetih rual hian kan Medical College neih chhun-Zoram Medical College tia hming koh pawh chu state sorkarin sum a neih loh avanga a enkawl theih tak loh avangin Central sorkar ah laksak turin 22nd September,2022 khan Union Health Minister hnenah ziakin Mizoram CM hian a thlen leh ta bawk a ni a ti.
Pu Hmuaka chuan kan state Chief Minister hian Made in Mizoram chu a that ber thu leh Made in India chu an duh loh thu sawi thin mahse a thil tih ah hian Made in India tha a tih zawk zia alang zel a. Kan thenawm state zawng zawng ten Made in India Party BJP chu an state ah an sorkar pui a; an din chhuahpui laiin, keini state sorkar Pu Zoramthanga kaihhruai sorkar chuan hmai hnih neiin, leh lama awrsen leh lama awrdum a min kaihhruai avangin sum lamah harsatna kan tawk chho mek ta a ni a ti. Covid-19 avangin Mizoram ah sum harsatna a awm lova. Sum enkawl thiam loh avangin Mizoramah sum hi kan harsa ta zawk a ni a ti bawk.
Lengpui Airport a ni emaw, kan Medical College chungchang a ni emaw kan State ramri chungchangah ani emaw kan Chief Minister hian mipui hmaah hian thudik sawi thin se, dinna nghet nei se tih hi BJP Mizoram Pradesh chuan kan phut a; New Delhi a thu zuk sawi thin leh Mizoram a thusawi thin chu chhim leh hmar anga a inpersan ani thin hi BJP Mizoram Pradesh chuan sim vat turin kan Chief Minister chu kan chah a ni a ti bawk.
