Vawiin June ni 12, 3023 hian Tuirial Block-II Congress Committee buatsaihin Khawkunga Hall, Bukpuiah Political Training neih a ni a, MPCC President Lalsawta leh MPCC Treasurer Dr. Lalmalsawma Nghaka ten an hmanpuiin, MPCC President Lalsawta chuan Tuirial Block-II huam chhunga khaw hrang hrang ṭangin mithar duhawm tak tak voters 15 a lawmlut nghal bawk.
He huna thusawitu MPCC President, Lalsawta chuan, ‘sum ngah ngah hmelṭha’ tiin kan ram hi ram hreawmah kan siam leh dawn em ni, a teuh lo mai. Sum thil tih theihna hi kan chhu chat tur a ni. Khawi ram nge thlen kan tum, eng chen nge kan thlen dawn tih hi ngun taka kan ngaihtuah a ngai a ni. Mizoramah ‘Tuirial Bial hi Candidate ten pawisa tam tak an senna a ni’ tiin politician te leh ram mipuite hian an hre tlat a ni. Nimahsela, chutiang chu a ni dawn lo. Tun aṭanga kan inthlan hun hi thla 5 chauh a ni tawh. Sum leh paiah kan insum thei a ni. Nehemi-a’n sawi chhiata kan awm tawh lohna turin tia siam ṭhat hna a thawk ang khan miten Tuirial Bial an sawi chhiatna zawng zawng hi Congress Party hian tih reh kan tum a, Candidate te sum sen tlemna bialah siam kan tum a ni. Vawiina kan sual tum, inthlanna a sum hman tlem hi kan hneh ngei tur a ni. Hei hi Kohhran leh MPF te duhdan a ni a. Pathian leh a Kohhrante duhdan anga kan kal dawn avangin anni pawhin min pui ngei ang, a ti.
Lalsawta chuan sorkar ṭha pawimawhna chungchang sawiin, ram tana thawk an nih avangin Minister te leh MLA te chu lo rethei deuh mai rawh se, an rawngbawl sak tur mipuite hi hausa tur chu an ni. Ṭang Puihna leh Sorkar ṭha hmangin kuthnathawktute kan chawi chhuak dawn. Khawvel ram changkangte neih ang ram leh mipui kan nei. Ram leh mipuite hmang hian kan ram hi hmasawn tir kan tum a ni. Pathian min pek kan ram enkawl turin environment ngaipawimawh chungin ram hi enkawl a nih tur thu a sawi a. Mi thil chik miten Congress Party an rawn zir a, rin tlak a ni, tiin June thla chhung hian inlawmluh runpui kan nei dawn a ni, a ti.
Lalsawta chuan, nakum 2024 a India ram Lok Sabha inthlanpui lo awm turah hian India ram mi thil chik mite chuan Congress Party in sorkarna chang turah an ngai, tih sawinin, tun hnaiah Karnataka-ah sorkar tura seat 113 kan mamawh laiin seat 135 lai kan la a, Mizoramah pawh ram leh hnam hmangaihtu, kan ram tana ke rawn pen chhuak tur mi ṭha tak tak Candidate kan neih dawn avangin kan sorkar dawn. Party dang angin Candidate ah buaina kan nei ve dawn lo, inlungrual takin, kan ram leh hnam siam ṭha turin Congress kan sorkar ngei dawn a ni, a ti.
MPCC Treasurer Dr. Lalmalsawma Nghaka pawhin thusawiin, Ṭang Puihna hmangin kuthnathawktute dinhmun chawikang turin kan inbuatsaih mek a. Mizoram hi siam danglam kan tum a ni. Congress Party hian sorkar ṭha kan siam tur hi mipui nawlpuiin pawhin chu sorkar ṭha chu an chhawr dawn. Tuna kan sorkar hrawn mek erawh mi tlemte bakin an chhawr lo. Mipui nawlpui ban phak, miretheite khaichhuaktu tur sorkar hi Pu Lalsawta hova din kan dawn a ni, a ti.
He huna thusawitu Rosiamngheta, AMC Corporator pawhin, mahni chauh inngaihtuah thei kan ni tawh lo. Kan tu leh fate tana chenna tlak khawvel thar hi vawiin ni a kan buatsaih a ngai. Chutianga thawk tur chuan Congress Party a inbuatsaih chho mek. Politics hi sum leh pai zawnna tur a ni lo. India ram kan thlir a, Politics avangin Kristian Biak In chu hal a ni tawh. Kan ram, kan hnam, kan sakhua humhim tura sakhaw zalenna chawi nungtu Congress Party a sorkar leh theih ngeina tura theihtawp chhuaha ngaihtuahna pawh seng turin kalkhawmte a chah bawk.
He Political Training hi R. Lalduailova, President, Tuirial BCC – II in kaihruaiin, Upa Lalrinchhana’n hunserh a hmang a. Lalhmingthanga Pachuau, ADCC President in thu a sawi bawk.
