PC party chuan thuchhuah siamin, “Kum 35 liam ta a, Brig.T.Sailova kaihhruai PC sawrkarin, sawrkar laipui sum ringawta innghat lo va, kawlphetha chakna hmanga ram intodelh kan nih ve theihna tura hma lakna thui tak an lo neih tawh Congress leh MNF Party-ten sawrkarna an inchanchhawk chhunga an hlamchhiah avang chauh a vawiinah hian Mizoram sawrkar hi suma talbuai ta ah PC Party chuan kan ngai,” an ti.
Thuchhuahah chuan, “Mizoram leilung hausakna hmanga ram intodelh tumna kawnga ke pen aia mahni leh party hmakhua ngai pawimawh zawk sawrkar kan hrawn thinte avanga derthawng tak dinhmuna Mizoram a ding reng mai hi PC Party chuan a thanatthlak kan ti tawh tak zet a. Tun ang dinhmuna kan kal zel chuan kan ram hian dinchhuah ni hmel a hmu ngai dawn lo va. He kan ram tluchhe mek tungding leh tur hian PC Party Policy leh Programme, Economic Policy, ‘Khawl Hnuh Hmasawnna’ tihhlawhtlin a ngai tak zet a. Zoram mipuite thawhhopui ah PC Party chuan kan sawm thar a che u,” an ti bawk.
