MIZORAM FIRST pawl huaihawtin vawiin khan ‘Sumdawnna hmanga inchimral theihna kawng’ tih thupuia hmangin Aijal Club ah sawihona neih a ni a. ZR Thahmingliana’n sawihawnna neiin Panelist atangin Prof.Vanlalchhawna, MZU, Lalhmachhuana Vice President, CYMA leh PC Laldinthara, President, MIMA ten thupui an sawi. Political party hrang hrangte, sorkar department, CYMA, AMC, ATC, AICS, MZUSC, MURSA, MSU, leh MRM atangte in aiawh kalkhawmin sawihona hlawhtling tak neih a ni.
He hunah hian Mizorama hnam dang sumdawng an inpharhzau tawhzia sawilan a ni a. Mizo hming hawha vai sumdawng an tam thu leh Mizo ngeiin an hum thin thu sawichhuah a ni a, hei hi hnam phatsanna a ni tih hriat a tul a ni tih sawichhuah a ni. Sum um avanga in leh dawr luah tura Mizo aia vai duhsak hi Mizo hnam hmalam hun atan a pawi thei hle tih an sawi.
Sumdawnna hmanga chimralna hian khawtlang nun, hnam nun leh sakhaw nun thlengin mi a nghawng theih avang leh kan chhehvela hnam chimrala awm tate avang hian kan harh a hun tawh takzet a ni tih sawi a ni. Mizote hi kan sumdawnna kawngah dik tak leh hnam dang aia Mizo duhsak a pawimawhzia sawichhuah a ni.
Mipui, official leh sorkar in an tihtur theuh ti tura kan tan tlan loh chuan Mizo hnam hi chimral mai theih dinhmun hlauhawmah kan ding tih chu kalkhawm zawng zawngte pawm tlan leh sawi a ni a, kan ram leh hnam damna chu mimal tinah a innghat a ni tih tarlan a ni.
