Vawiin khan Supply Minister Pu K Lalrinliana hovin a pisa-ah Mizoram chhunga tuialhthei dahkhawlna (Oil Depot) siamna tur a ruahman Sihhmui leh Bairabi-a ram en mek feasibility study (a hman theih dawn leh dawn loh zirchianna) neih tawhna report thlirho a ni.
He thlirhonaah hian Rail-fed Oil Depot siamna tur hian Ram Acre 30-35 a zau leh railway siding full rake atan (oil phur rail wagon 42 dinna tur) ram metre 800-a thui awm theihna tur mamawh a nih thu ngaih thlak a ni a. Report-a a lan danin Bairabi ah hian half rake pahnih (400 mtr, wagon 21) siam theih a nih thute, a hmun a zawl that thu te ngaihthlak niin, railtrack (rel kawng) atanga siding panna tur motor kawng National Highway chu bridge (lei) dawh emaw leihnuai verh tlang emaw a ngaih tur thu ngaihthlak a ni bawk.
Sihmui-a ram en mekah hian 132 KVA line sawn ngai a awma, chubakah a ram a zawl that tawk loh avangin ram laih tur leh hnawhkhah tur a tam hle a, rel leilawn te pawh dawh a ngaih hmel a, hemi hmun panna atan hian kawng (approach road) sial a ngaih tur thu te pawh ngaihthlak a ni a, a hmun siam rem nan hian sum tam tak sen a ngaih thu ngaihthlak a ni.
IOCL Land Selection Committee in tun thla chawhma lamah heng hmun pahnih hi rawn tlawhin, team panga in technical feasibility study rawn nei leh a, oil depot atana ram thlan tur hi tun thla chhung ngeia an tihfel tur thu an sawi a ni.
Supply Minister ho a sawihona neih zawh hian Chief Minister Pu Zoramthanga hova sawiho lehnghal niin, Chief Minister chuan Mizoram ah Oil Security a awm theihnan theihtawp chhuaha hma la tur in a chah a, Sawrkarin an hmalaknaah theihtawpin a puih tur thu a sawi bawk. IOCL lam hian tun kum chhunga ram lei fel an tum thu leh Oil Depot hi kum 2-3 chhunga an siam zawh theih an inbeisei thu an sawi a ni.
