Secretariat Conference Hall, MINECO -ah vawiin khan Social Welfare Minister Dr K. Beichhua chuan ‘Survey Report on Children and Drugs in Mizoram 2022’ a tlangzarh a. KT Beicho, Commissioner and Secretary, SWD-in kaihruaiin Debashis Mukherjee, International Expert on Drug and HIV hnen atangin report presentation thlir ho nghal a ni.
Dr K. Beichhua chuan ram leh hnam chhan nan ruihhlo do a tul thu sawiin, naupangte zingah zuk leh hmuam, ruihtheih thil ti an tam ta lutuk chu pawi a tih thu a sawi a. Vawikhat tihchhin a pawizia leh nghawng tha lo nasa tak a neih theih thu sawiin, naupang te an nihlai atanga zirtirna pek a pawimawh thu a sawi. Ruihhlo, zu, drugs leh a kaihhnawih dona kawngah mipui, khawtlang leh NGO te tanrual a pawimawh thu sawiin, ruihtheih thil leh rilru lam kaihhnawih harsatna a kalkawp tlat a, naupang leh thalaiah rilru buaina, beidawnna, tha tawkloa inhriatna, intihhlum duhna hial a thlen nasa em em a ni tiin vawiin programme chuan rah tha tak a chhuah ngei a beisei thu a sawi.
Programme-ah hian Department hrang hrang aiawh leh YMA, MHIP aiawh te an kalkhawm a, survey report chungchang sawihona nei zuiin, hmalak zel dan tur ngaituah ho nghal a ni. Donnie, Joint Secretary SW & TA in lawmthu sawiin hun a khar a ni.
‘Study on Drugs and Children in Mizoram 2022’ Ruihhlo hmansual chungchang naupang bika zirchianna (state specific) hi India rama state sawrkar bik fund na hnuaia naupangte zirchianna awm hmasa ber a ni a, ram tana mellung pawimawh tak a ni. He Survey-in a tum ber chu tleirawl/rawlthar kum-18 hnuailamte ruihhlo leh a kaihhnawih chungchanga an dinhmun leh an derthawnna zirchian a ni. Naupang kum-10 leh 17 inkar Middle school, High school, Higher secondary school leh School kal tawhlo (School dropout) ah te Drug survey hi neih a ni.
Survey report-in a tarlan tlangpuite chu:
• Naupang school kallai mek leh kal tawh lo (school dropout) te pawhin ruihhlo hi an lo hmelhriat hle tawh a ni.
• Naupang ruihhlo tih tan kumte pawh a kum telin a hniam chho zel a ni.
• Naupang school kal chhunzawm lo (school dropout) thenkhatte chu ruihhlo an khawih vang a ni tlangpui a. Ruihhlo chak zawkah lut chhovin an tih tam mai bakah a zing tial tial a ni.
• Zirchianna atanga lan danin naupang ruihhlo ti thin te zingah rilru lam kaihhnawih harsatna (inattention, anxiety leh depression, etc) a tam phah ni a hriat a ni a. Khawvel pum huap pawhin ruihhlo hmansual leh rilru lam kaihhnawih harsatna hian inkungkaihna a nei nia hriat a ni.
He zirchianna hian ruihhlo laka naupangte venhim kawngah zirna In (education system) te kaltlanga hmalak a hun tawhzia a tarlang a. Sawrkar Department hrang hrang leh NGO te lungrual taka an hmazawn theuhva ruihhlo dona kawnga theihtawpa tanlak a tul tawhzia a tarlang bawk a ni.
He Survey report buatsaihtute chuan ruihhlo dona kawngah, a bik takin naupang kum-18 hnuailamte zingah leh hmalakna turah hmanraw pawimawh leh tangkai tak a nih ngei an beisei a ni.
