Congress party chuan thuchhuah siamin, “Mizoram Presbyterian Kohhran Synod Inkhawmpui vawi 99-na, ni 6-11.12.2022 chhunga Khatla Kohhrana neih tluang taka zawh a ni ta hi MPCC chuan lawmawm a ti takzet a. Synod inkhawmpuiin kan ram hmalam hun atana fimkhur tak leh ngaihtuahna uluk tak hmanga hlemhletna do tur leh ram hruaitute khalh ngil tura Politics siam that tuma chak zawka hmalak an tumna hi Congress party chuan lawmawm a tiin, theihtawpin a thlawp dawn a ni,” an ti.
Thuchhuahah chuan, “Congress party chuan Kohhran kaltlanga kan ramin hmasawnna tam tak kan neih te, Kohhranin kan ramah remna leh muanna palai hna nasa taka a thawh avanga remna leh muanna kan neih hlut ziate Congress party chuan a hre reng a, a ngaihlu takzet a ni.
“Mizoram hmun hrang hranga Congress Party mipui leh Mizoram mipuite pawh kan rama hlemhletna umbo tur leh Politics tha leh dik kan neih theihna tura Kohhran hmalakna tihlawhtling tura theihtawp chhuah turin kan ngen a. Kan President Pu Lalsawta’n sum chakna chhu chat tur leh MLA Candidate te ti hau tak lo turin Mizoram mipui a ngenna leh Congress Party in hma a lakna te min hriatsak tur leh, min tawngtaipui turin Mizoram mipui kan ngen a ni,” an ti bawk.
