Vawiin ni 14, August, 2024 hian Congress Party chuan Lal Thanhawla Auditorium ah ‘HRUAITU INTUAITHARNA’ hun an hmang a, he hruaitu intuaitharna atana Speaker Pu Challianthanga, SYNOD Revival Speaker ni bawk chuan thu sawiin, “Congress hi ka tehkhin dan che u chu perek kawi tawh, chhut ngila hmantlak leh hi a ni. Term nga lai sawrkarna lo chang tawh in ni a, Lalpa malsawm ram rim in lo nam tawh thin a ni. Lalpa malsawm ram rim nam leh turin Lalpa’n a chhut ngila hman leh mai theih in ni.
“Tunah hian Aizawl laili ah Building tha tak in nei a, mithiam tak tak hruaitu in nei a, mi tha leh dik tak tak in nei a, thlarau mi tak tak in nei bawk a, mamawh dang in nei tawh lo, Pathian siamthar lehna chauh lo chu.
“Term nga lai lai sawrkarna in chang tawh a, tihsual palh chu a awm thei a ni. Mahse Pathiam lam in hawia, insiamthat in mamawh a ni. Chuvang chuan nangni pawh Lalpan siamthar che u a duh a, hmanrua ah hman leh che u a duh a ni. Chuvangin in insiamthar leh a ngai a, insiamthar leh rawh u.
“Tunah hian in mamawh chu fing leh thiam ringawt nilo, mi tha leh dik ringawt ni lo, huaisen tel kan mamawh a ni. In danglam a ngai a, nangmahni hi in kehsawm tak tak chuan Alabasta hriak rimtui ang kha nangmahni atangin a lo chhuak ang. Chu chu miten in fehchhuahna ah te an hmu anga, in lam an lo hawi ang.
“Mi vannei leh mi hamtha ni turin ka duh che u a, chutiang mi ni tur chuan Pathian hnenah in intukluh a tul a ni. Lalpan a duh ber chu sual simna a ni. Lalpa tilawm leh turin a hmaah kehsawmin i i hlan ang u. Lem in chan loh a, tihtak zeta in tih chuan Pathian hian a tungding leh ngei ngei ang che u.
“Helna rilru hi Pathianin a duh lova, a vui zawng nilovin hotute thu pawm thiam rawh u. Chutichuan Pathianin a chawikang ang che u.” a ti.
He ‘Hruaitu Intuaitharna” Programe hi Pu Lalnunmawia chuaungo, Sr Vice President, MPCC chuan a kaihruai a, Bible chhiar leh tawngtaina hun Dr. Lalmalsawma Nghaka, Treasurer, MPCC chuan a hmang a, Pu Lal Thanzara, Predsident, MPCC chuan lawmthusawina a nei bawk a ni.
