Vawiin khan Tawngtai Bethel Camping Centre (TBCC) ‘electric disconnect’ thut a nih avangin an harsatna tawhte finfiah turin, TBCC Sakawrtuichhun hmunah MPYCC President Dr. Lalmalsawma hovin Congress Thalaiin an tlawh nghal.
Dr. Lalmalsawma chuan, “Mi 700 dawn lai tunah hian TBCC-ah hian an awm mek a, khaw lum karah harsatna nasa tak an tawk dawn a, an dinhmun en hian ngaihtuah ran an ngai a ni. Sorkarin ngaihdamna sang ber nena connection pe leh nghal tur te, concession pe tur leh mi thilphalte pawhin ngaihven rang turin kan ngenpui takmeuh a ni,” a ti a. TBCC-ah hian zu leh damdawi (drugs) hmansual avanga harsatna tawkte dahkhawm an ni a, khawlum lutuk nen harsatna an tawh palh a hlauhawm hle a ni, MPYCC President chuan a ti.
Tawngtai Bethel Camping Centre hi Chawnpui-ah kum 14 lai an awm tawh a, Sakawrtuichhun, Aizawl Sahuan (Zoo) atanga pen pheia Liando Resort pelhah kum 2019 khan an insawn a. Kum 2019 an insawn kum hian an Camping Centre atan hian Electric pawt lutin, Rs. 1,40,000/- an seng a ni. Phase III an mamawh ni-a inngaiin an pawt a, mahse electric bill chu Chawnpuia an chawi ang thla khata Rs. 2000-3000/- chawi tur emaw an in tih laiin, bill a lo san tak em avangin an pe thei lo ta fo a, Phase hrangin an tihtir leh hnuah bill a la ngai reng tih Pu T.T. Zohmingthanga, TBCC Founder chuan MPYCC hruaitute a lo hrilh.
Pu T.T. Zohmingthanga chuan thla hmasa lam atang khan an electric bill cheng nuai 5 dawn lai mai an pek theih loh avangin disconnect tura hriattir an nih thu a sawi a, a zatve tal chhunglut turin tih an lo ni bawk a, an neih ang ang Rs. 25,000/- an chhunglut tih a sawi a, vawiin ni 16.7.2022 hian TBCC electric connection chu tihtawp sak an lo ni ta tih MPYCC hruaitute chu a hrilh a ni.
Dr. Lalmalsawma chuan Electric bill sang zel chu ngaihtuah nawn a ngai tawh hle tih sawiin, “Electric hman man sang ta vak hi nitin eichawp zawng mi harsa zawkte leh Mizorama chhungkaw tam zawkte tan phurrit a ni ta der mai, kan sorkar hian electric chhit man a tihsan thur thur hi bengsika a ennawn leh a pawimawh hle. Electric bill sang hi buaina tham a tling ta,” a ti a. Congress Thalai President hian TBCC hi Rs. 10000/- in a tanpui nghal a ni.
TBCC hnuaiah chhuakah hian Missionary panga (5) an awm tawh a, hman ni khan BD zir tura chhuak a awm, BD zirzo leh BTh zir zo tawhte an awm nawk tawh a. College kal tha leha bultan lehte leh eizawnna kawnga bul tan tha lehte an awm nual tawh a, kum 2005-a din a ni.
