Aizawl, May 13 : Vawiin khan Taxation Deptt. chuan an Department Auditorium, Aizawlah kum 2021-2022 chhunga an sum lakkhawm tur sawrkarin revenue target a bituk an hmuh kim lawmna hun an hmang a. Taxation Minister Lalchamliana chu khuallian a ni.
Lalchamliana chuan Taxation Department in kum 2021-2022 chhunga sum lakkhawm tur sawrkarin a bituk zat a hun taka an lakhawm thei mai piah lamah, sawrkarin target a siam sak nasa taka an khum thei chu lawmawm a ti a, an Department thawh rah chu ropui leh chhuanawm a tih takzet thu a sawi a ni. Pawl leh sawrkar hi sum tel loin a kal thei lo a, hna a thawk thei lo a, mipuite sum thawh tlingkhawm atangin sawrkar hi a kal a ni, a ti a. Taxation Department-a thawktute thawhrimna zarah leh mipuiin tax hi kan pek ngei ngei tur, kan mawhphurhna a nihzia kan hriat telh telh avangin hma kan sawn zel a, sawrkar kum kal meka chhiah lakkhawm tura bituk pawh kan khum theih leh ngei a beiseiawm, Taxation Minister chuan a ti.
Khuallian chuan tun hnai kum 5 chhunga Taxation Department sum hmuhchhuah dan thlirin an thang nasa hle tih a lang a, a bik takin GST ah thanna a sang hle, a ti a. Amaherawhchu, Profession Tax ah erawh an tlahniam deuh thung tih a sawi a, “Tax dik taka pek hlutna leh kan tih tur a nih zia hi mitinin kan hriata, tha taka kan zawm theuh theihnan theih tawp i chhuah tlang zel ang u” tiin thawktute leh mipuite a fuih a ni.
Taxation Department hi sawrkar leh mipuite tan a pawimawh hle a. Kum tin sawrkarin tax revenue lakkhawm zat tur a bituk thin a. Kum 2021-2022 chhung khan chhiah khawn tur a bituk zat chu cheng vaibelchhe 717.13 a ni a, an target hi cheng vaibelchhe 177.71 zeta khumin an chhiah khawn zawng zawng tling khawm hi cheng vaibelchhe 894.74 a ni a, an thanna hi za zelah 32 zet a ni. GST hman hnuah kum 5 chhunga an thanna chu khaikhawmin 23.8% a ni a. Kum 10 kaltaa an revenue collection atanga teh chuan kum kaltaa an collection hi 384% in a tam zawk a ni. Taxation Department hian State’s Own Tax Revenue (SOTR) ah a chhung lut hnem ber bawk a ni.
DCST & GST Nodal Officer C.Vanlalchhuana report atanga a lan danin Taxation Department chuan kum 2021-22 khan cheng vaibelchhe 20.23 an hmang ral a, hetih lai hian cheng vaibelchhe 894.74 zet an khawnkhawm thung a. An expenditure hi investment a ni mah zawk tih sawiin Pu C.Vanlalchhuana chuan “Saitual, Khawzawl leh Hnahthial District ah te officer dah an nih chuan expenditure aia tam daih kan thawkchhuak dawn tihna a ni thei,” a ti.
Taxation Department chuan chhiah chi thum GST, Mizoram Value Added Tax leh Profession Tax a lakhawm thin a. GST atanga lo lut hi a tam ber a, kum 2021-22 chhung khan cheng vaibelchhe 731.55 a tling a ni. MVAT atangin cheng vaibelchhe 148.83, Profession tax leh a dangte atangin cheng vaibelchhe 14.36 an lakhawm a ni.
Kum 2005 a MVAT Act hman a nih atangin Taxation Department chuan computer leh online service ah tan a la nasa hle a. Mizoram Sawrkar hnuaia Department hrang hrang zingah computer leh internet hmanga hnathawk hnem pawl niin an website zotax.nic.in kaltlangin e-payment ah sum tam tak sawrkar tan a lalut thin a. ICT Department buatsaih Government Online Excellence Award 2021-2022 ah Category-I: Official Department Website ah pathumna lawmman an dawng a ni.
