Vawin khan TB endikna khawl thar- Culture & Drug Susceptibility Laboratory chu District TB Centre, Falkawn-ah Health Minister Dr. R. Lalthangliana’n a hawng.
Khuallian Dr. R. Lalthangliana chuan National TB Elimination Programme hnuaiah TB endikna khawl thar hawn a ni thei ta chu lawmawm a tih thu a sawi a. TB enkawlna chuan bungthar kaiin TB endikna khawl thar chu Mizoram-ah a hmasa ber tur a nih thu a sawi a, he khawl hi a nihna anga hman theih a nih hunah TB damdawi hrang hrang te damlo in a ngeih leh ngeih lo tur te a hriat theih vek dawn tih a sawi. Health minister chuan kumin January atanga June thla chhung khan TB damlo 1000 chuang hmuhchhuah an nih thu a sawi a. Heng atang hian MDR-TB vei 60 chuang hmuhchhuah niin mi 39 TB vangin an thi bawk tih a sawi a.
Minister Dr. R. Lalthangliana chuan khawvel pum huapa TB umbo tumna kum 2030 aia kum nga hma 2025 ah India ram chuan TB umbo a tum tih a sawiin kum 2015 atanga khaikhinin kum 2025 ah chuan TB vanga thihna chu 90% a tihhniam a tum a nih bakah TB natna thleng thin chu 80% a tihhniam tum bawk tih a sawi a ni. Mizoram atanga TB umbo turin hmalakna thui tak a la awm thu sawiin, tanrualna leh tih tak takna nen TB umbo theih ngei a beisei thu a sawi.
Minister Dr. R.Lalthangliana chuan TB test na khawl thar chuan rintlak zawka TB natna hmuhchhuah kawngah te, damlo ten damdawi an ngeih leh ngeih loh enzuina kawngah te a tangkai dawn tih a sawi a. Guwahati-ah sample thawn a, hun rei tak tak sen thin te, damlo enkawlna kawnga harsatna hrang hrang an tawh thin te chu he khawl thar hman theih a nih atang chuan heng harsatna te hi sutkian a ni dawn tih a sawi. Hei hi TB damlo te leh TB programme tan chanchin lawmawm tak a ni a ti.
Health Minister chuan TB natna chu Mizo ten kan ngaihthah tawh hle tih sawiin, TB natna chu kan ngaihpawimawh thar a, a invenna kawngah kan tan thar a ngaih thu a sawi a. Mi pahnih khat hmanga TB hi umbo theih a nih loh thu sawiin, kan zavaia tangruala, Mizoram hi TB awm lohnaa siam tura hmalak ho a tul takzet tih a sawi.
TB test na laboratory hi ruahman dan chuan kum 2020 June thla vel atanga hman theih tur a tih a ni a. Thawhzawh tep a nih tawh laiin COVID – 19 test nan hman lailawk a nih leh avangin hun a kal thui ta hret a ni tiin a sawi.
TB endikna khawl C & DST Laboratory-ah hian Drug Resistant TB (MDR-TB) leh TB pangai te hmuhchhuah theih a ni anga. TB damdawi ten TB hrik a that thei nge that thei lo tih te, damlovin damdawi a ngeih tur te zawn chhuah theih a nih bakah, TB damlo te an inenkawl laiin an damdawi ei lai an ngeih leh ngeih loh test zui reng nan hman theih a ni dawn a ni.
He khawl hawnna programme hi Dr. Eric Zomawia, Mission Director National Health Mission chuan a kaihruai a. Dr. Vanlalfela State TB Officer chuan he Laboratory dinna tura hmalak dan te a sawi bawk a. Dr. T. Lalhmangaihi, Principal Director Health & Family Welfare chuan lawmthu sawiin he hun hi a khar a ni.
