MNF Adviser Dr.R.Lalthangliana, a bial chhung khaw hrang hrang tlawha zin mek chuan Inrinni May ni 14, 2022 khan New Ngharchhip, Ngharchhip, South Chawngtui, Khawhri, Aithur leh Tarpho khuate tlawhin khawtlang hruaitute nen inkawmhona an nei a. Heng hmun hrang hrangah te hian thusawiin, Dr.R.Lalthangliana chuan, heng laia kawng siam mek an chawlhsan rih chungchang hi a ngaimawh thu sawiin, kan hun hmaa sorkar hmasaten an lo inpek tawh kha a ni a, Contractor pawh ka la hmu lo a, telephone erawh chuan ka be tawh, a ti a. A theihtawpa department leh Contractor-teah pawh hma lak a tum thu a sawi a, kumin August thla chhung hi chuan an zo hman tawh turah kan beisei a ni. Hmun thenkhatah Contractor-ten hna an hralh thin a, hna a that loh phah a, hna a muang bawk a, hetiang hi chu keini chuan kan duh loh zawng tak a ni, a ti.
Commerce & Industry Minister, Dr.R.Lalthangliana chuan, “Myanmar politics boruak vangin Myanmar nen border trade chungchangah hma kan la hlei thei lo a, Bangladesh lam nen erawh tluang takin kan indawr mek zel a, chak taka hma lain, a taka kan insumdawn tawn theih hunah chuan heng lai vela chengte hi a zar zo hmasa tur in ni a, in balu leh thlai thar hrang hrangte hi hlawk zawkin in hralh thei dawn a, hmasawnna tam tak in neih phah dawn a ni,” a ti.
Health Minister Dr.R.Lalthangliana chuan, “Covid-in kum hnih leh a chanve vel min tihbuai nasat avangin kan hmalakna tur tam tak pawh hma kan la hlei thei lo va. Mahse, Covid hian hniam lam a pan mek a, theih tawpin tan kan la mek zel a ni. A ram pum angin covid do kawngah kan thawhhona a that avamgin lawmthu ka sawi nawn leh a, kan thawhhona Pathianin mal a sawm a ni. Term lehah kan Chief Minister zahawm tak Pu Zoramthanga kaihruai MNF hi Pathian leh mipui zarah kan sorkar leh ngei ang a, covid avanga hma kan lak theih lohte hi chak takin hma kan la thei tawh dawn a ni,” a ti bawk.
Dr.R.Lalthangliana hian a bial chhung khaw thenkhata khaw chhak lam unau, polotics buai avanga rawn tlan thlate tlawhin tanpuina tangka fai a hlan nghal bawk a ni. Ngharchhipah hian Congress chhungkaw 3 te chu MNF-ah a lawmlut nghal a ni.
