“Mizoram Assembly Budget Session neih mekah March 3, 2025 khan Mizo țhalaite hamțhatna tur Bill pahnih – ‘The Mizoram Youth Commission Bill, 2025’ leh ‘The Mizoram Private Placement Agencies (Regulation) Bill, 2025 chu pass a ni a, Mizo țhalaite hmangaihtu sorkar kan nei hi kan chhuang takzet a ni,” ZPM Țhalai Headquarters chuan an ti.
ZPM Thalai chuan, “ZPM a sawrkar tirh ațangin țhalaite hmakhua ngaiin sorkarin hma a la chak hle a, tuna MYC Bill thar pass tak avang hian MYC chak zawk leh țha zawk kan nei thei dawn a, Labour, Employment, Skill Development & Entrepreneurship (LESDE) Minister Pu Lalnghinglova Hmar bakah MYC Chairman Pu Malsawmzuala leh thawktute chungah lawmthu kan sawi a ni.MYC Act hman mekah mahni duhsak zawngte hnathawka rawih mai mai theih a ni a, thawktu lak, an hlawh leh thawh rei zawng tur pawh sorkar kalphung pangngai zawm loin phuahchawp taka kalpui a ni. Hei bakah hian an sum leh pai che vel te Audit lohin kalpui mai țhin a ni bawk a; ZPM sorkar chuan hei hi țha a ti loin dan dik taka kalpui turin MYC Bill thar a pu lut ngam hi a lawmawm kan ti.
“Chief Minister Pu Lalduhoma’n huaisen taka, “Thil ṭha lo hi chu kan sawi ngam tur a ni a, kan siam ṭha ngam bawk tur a ni. Kalphung hlui thilte chu a tharin kan thlak zel dawn,” a ti hi ZPM Thalai chuan lawmawm kan ti a ni.MYC-in dan langtlang zawk hmang a, induhsakna uchuak awm thei a titawp ta hi Chief Minister leh a thawhpuite chungah kan lawm hle a ni.Mizo țhalai Ram pawna hnathawka eizawng a chhuak țhinte tan pawh dan hnuaia him zawka an chhuah theihna tur dan thar duan a ni ta hi ZPM Țhalai Headquarters Aizawl chuan thinlung takin lawmthu kan sawi a, The Mizoram Private Placement Agencies (Regulation) Bill, 2025 hi a taka hman a nih hunah chuan ram pawna eizawnga chhuak Mizo țhalaite tan innghahna tlak dan țha tak kan nei tawh dawn a ni,” an ti bawk.
