Mizoram Pradesh Youth Congress Committee (MPYCC) President Dr. Lalmalsawma Nghaka chuan, Thalai mahni inringtawk, mahni ke-a ding leh intodelh tir hi Congress party chuan kan ngaih pawimawh leh tum ber a ni, a ti.
He thu hi nizan khan Mizoram Pradesh Congress Committee (MPCC)-in Aizawl khawpui chhung Local Council tina Congress Unit te tlawhchhuah programme a duan anga Maubawk Veng Congress Joint Unit te a tlawhnaah sawiin, “Congress Party chuan Thalaite tha tih chak a, an hmakhua (future) tur ngaihtuahsak hi kan tum lian tak pakhat a ni a. Congress kaihhruai sawrkar kum 10 kalta chhung khan an hmasawnna tur atan nasa takin hma kan la a. Zirna, eizawnna kawng leh infiamna lamah hmasawnna ruhrel (infrastructure) pawh thahnem tak kan din a. Vawiina khawvel huap inelnaa Mizo thalaite kan lan ve phak tak nachhan hi hmathlir thui tak nei chunga kan hotute hmalakna rah kha a ni tih i hre thar ang u,” a ti.
Dr. Mala chuan, Mizo thalaite hi kan Pi leh Pute hun atang tawhin mahni intodelh leh mahni ke-a din tum tlat thin kan ni a, chu rilru chu tunlai thangtharte zingah hian a rawn lian thar em em a. A thlawna dawn leh sem (spoon feeding) lam aiin an thawh tur leh kawng kawhhmuh hi an duh zawk em em avangin Congress party chuan nakkum inthlanpuia kan manifesto No. 1 – Tang puihnaah pawh thalaite hmakhua hi kan tin zawn (focus) nghal hle a ni. Thalaite hi ram inghahna lungphum kan nih tlat avangin, Pathian leh mipuite zarah Congress party-in sawrkarna kan chan leh chuan thalaite hmakhua tur hi tunhma aia nasa lehzualin buatsaih kan tum em em a ni, a ti bawk.
Nizana Maubawk Congress Unit intlawhchhuah programme ah hian Unit OB te leh Congress Local Council Member te an kalkhawm a, zawhna leh chhanna bakah hmalak dan turte uluk leh zau takin an sawiho a ni.
