“THAT LOH THEIH LOHNA BAWM CHU SYSTEM DIK HI A NI” – Lalsawta
Vawiin ni 16.3.2022 (Nilaini) hian Lal Thanhawla Auditorium-ah Trainers’ Training Programme (That loh theih lohna bawm lehkhabu zirchianna) hun hman a ni a, Pu Lal Thanzara, Vice President MPCC in a kaihruai a ni.
Ṭhat loh theih lohna bawm lehkhabu ziaktu MPCC President Pu Lalsawta chuan, “MPCC chuan AICC Constitution ring lovin, Constitution hran a nei a, Central Congress nen tih dan phung leh kalhmang tam tak a danglam a ni. Chuvangin, Central Politics leh Mizoram Politics hi a hrang hlak a, Central lamah Congress Party che chhe deuh mah se, Mizoramah erawh nghawng a nei dawn lo. Central lama kan party chet chhiatna hi Mizorama Congress Party hruaitute chuan chonaah kan ngai a, kan phur tulh tulh a ni,” a ti.
Congress Party hi Committee kaltlanga inkaihruai thin kan ni a. Committee-in hun reiloteah bial vil tur leh ding tur pawh a siam fel mai ang. Chuvangin, kum 2023 Mizoram Assembly inthlan kan hmachhawn turah hian tuna MLA panga kan neih sa ten an bial vil se, chubak chu midang tan bial vil bik neih a rem lo. Mahni mimala bial vil hian sum hmanga campaign a hring thîn a, chu chuan MLA te a hnuah mipui chan-ai mahni mimal sum siamna a hring thin. Hetiang a thlen lohna tura mipuiin an pawm, mipui tana thawk tur mi rintlak pek hi Congress Party chuan a tum a ni. MLA ding sate bial vil bak Bial 35 hi chu Party mipuiin hneh takin kan vil mai dawn a ni,” a ti.
Pu Lalsawta chuan, “Sorkar tha mamawh em em Mizoram mipui, mi retheite leh thalaite dinhmun siam leh khai chhuah hi kan kutah a awm a. Mizoram mipui mamawh chu sum ni lovin sorkar tha leh rintlak a ni. Sorkar ṭha pe tur hian Congress party hi mawhphurtu kan ni. That loh theih lohna bawm hi sual theih lohna bawm a ni lo; Ṭhat loh theih lohna bawm chu system dik hi a ni. Leng khuaah chuan that loh theih lohna bawm an hung a. Lungrual loh theihna laka an him theih nan Kohhran pahnih hi awm se, tiin khawtlangin an rel mai a. An tui tlan enkawl chungchangah pawh fel takin that loh theih lohna bawm hmangin tangkai takin an enkawl thei. An sytem a dik vang a ni,” a ti bawk.
Ṭhat loh theih lohna bawm chhuahtu (Publisher) Hachhek bialtu MLA Pu Lalrindika Ralte pawhin Ṭhat loh theih lohna bawm lehkhabu chungchang buatsaih a nih dan a sawi a. A ziaktu Pu Lalsawta ngaihtuahna hi Pathian aṭanga chhuak nia a hriat thu a sawiin, Ṭhat loh theih lohna bawm lehkhabu hian ram leh hnam tana in pe turin min phut a, party ang pawha ram leh hnam tana in pe turin min phut a ni tiin, chutiang tura midang te tana malsawmna a nih ngei a beisei thu a sawi.
Pu Rindika chuan, tunhnaiah Congress party ngaihdan danglam leh mawi tak a hmuh thu sawiin, “Ka kalna leh chet velna hrang hrangah Congress party ka nih avangin a tha thei ang bera awm leh hmalak hi ka bat a ni. Congress Party in Thilṭha a tihna kawngah hian ka inthlahrung lo, ka ngaihtuahna pawh Congress party hmanga Mizoramin thil tha tam tak a neih zel theihna tur ngaihtuahna ka pu a ni,” tih sawiin, “Ram rorelna leh thuneihna hi tu in emaw an hlawk bik lawihna tur a ni lo. Congress party hi tute emaw tan bika thawk mai mai tur kan ni lo, kan ram leh hnam tana thawk tur kan ni,” a ti bawk.
Vawiina ‘That loh theih lohna bawm zirchianna’ Trainers’ Training Programme-ah hian Pu H. Zairemthanga, Secretary MPCC in hunserh a hmang a. Dr. Lallianchhunga, Spokesperson & Chairman Media Deptt. MPCC in ‘That loh theih lohna bawm’ sawihawnna hun a hmang bawk.
