MNF Legislature Party Secretary MLA L Thangmawia chuan Inrinni kalta a MPCC Media Department-in thuthar lakhawmtute an kawmna a ni 1.4.2019 atanga ni 14.7.2022 inkar chhunga Contractor-te Bill cheng nuai 100 chunglam chin, Mizoram chhunga Treasury 9-ten an pekchhuah dan RTI hmanga dil anih chungchang ah Bill 736 pek chhuah zingah bill 103 chauh thlang chhuakin, sorkar chu contractor duhsak bik nei anga lantir an tum chu That loh theih lohna bawm zuar tute hian Mizo mipuite hnenah zep then tam tak neiin Mipui bumna bawm an rawn hung chhuak nia an ngaihthu a sawi.
Vawiina Aizawl Press club a thuthar lakhawm tute MNF Legislature Party Secretary L Thangmawia leh MNF Media & Publicity Board hotuten an kawmna ah MPCC Media Department tena sorkar in Contractor za chuang bill pekte zingah an duh zawng paruk chauhte thlang chhuakin, an bill lak dan an thlur bing zui bawk a, hei hi mipui rilru dik lo taka hruaikawi tumna a nih avangin sawifiah a tul tih sawiin L Thangmawia chuan Finance Department atanga RTI chhannaah hian bill cheng nuai za chuang, ni 1.4.2019 leh 14.7.2022 inkara Treasury 9 ten an pekchhuah zawng zawng atang hian, bill an thehluh ni la la-a pek nghal bill 105 zet a awm tih a tarlang a ni.
Heng bill zinga a ni la la a Treasury-in a pekchhuah bill 105 te atang hian MPCC unauten duhsak bik ni a an sawi contractor 6 te bill hi 10 vel chauh an ni a. An tarlan ve loh, a ni la la a pekchhuah ve tho bill dang 90 chuang zet te hi duhsak bik an ni ve lo em ni? tih hi an zawhna a nih thu MNF Legislature Party Secretary chuan sawiin, MPCC unauten contractor pakhat chu ni 3 chhunga bill 2 release sak a nih avanga duhsakna dawng anga a hming nen lam an rawn tarlan hi han bihchian chuan, ni 3 chhunga bill release sak hi a vaiin bill 102 zet an awm a. Duhsak bik nia an sawi contractor bill 2 baka bill dang 100, ni 3 chhunga release sak ve tho te hi duhsak bik an ni ve lo em ni tih chu an zawh lehna a nih thu a sawi bawk.
MLA L Thangmawia chuan MNF Sawrkar duhsak an tih contractor te Bill zawng zawng belhkhawm hi Rs 65,82,21,651 (Vaibelchhe 65+) a ni a. He tih lai hian an sawi kim duh loh Contractor dang te Bill belhkhawm chu Rs 33,31,69,63,074 (vaibelchhe 3331+) a ni daih thung. Duhsakna dawng an tih te bill hi Contractor dangte bill ai chuan a tlem hle a, a inthlauhna pawh Rs 32,65,87,41,423 (Vaibelchhe 3265+) lai a ni a, Bill chhuak zawng zawng atanga MPCC unaute rawn tarlan bik Contractor 6 te chan zat percentage chu 1.93% chauh a ni a, An sawilan tel loh contractor dangte chan chu 98.06% a ni. Hetianga duhsakna bik dawng anga sawi luih talh an tum hi hre reng chunga mipui rilru dik lo taka hruai luih tumna a ni tih loh theih lo ah ang ngai tih MNF Leigislature Party Secretary chuan sawiin MPCC unau ten Contractor duhsak bik riau paruk vel awm anga Zoram mipuite hnena an puangzar hi thu dik a nih loh zia a lang chiang hle a. Mizoram sawrkar chuan hmasawnna hnathawktute hnenah a remchan dan ang leh sum awmdan ang zelin rualkhai takin bill te hi a pe chhuak zel thin zawk a ni tih chiang takin a lang tih L Thangmawia chuan a sawi a ni.
