Dated Thenzawl, 15.January.2025 ; Vawiin khan Animal Husbandry & Veterinary Minister Pu C Lalsawivunga chuan AH&VETY farm Thenzawl a mi chu a tlawh a, hmun hrang hrang tlawhin department hmalakna leh hmalak dan tur te a hmunah a enpui.
AH&VETY Minister chuan heng hmunah te hian thusawiin, “Thenzawlah hian AH&VETY hian 769 acres a zau ram kan nei a, bul lo ṭantu te leh lo enkawltu kan mi hmasate ka fak hle a ni. Ran vulhtute pawhin he lai hmun hi an chhawr tangkai hle a, chutihlaiin hei aia an chhawr ṭangkaina tur hian hma kan la zel dawn a ni. A hma in ran chaw hmun hi Ṭin 57 a zau a awm a, ZPM kan sorkar hnuah hma thar la in, kum 2024 ah Ṭin 70 hmun siam belh leh niin Ṭin 127 hmun zet a zau ran chaw siamna hmun kan nei tawh a, kan la zauh zel dawn a ni. Ran chaw hi a ro hralh chhuah theih turin kan peih fel tawh a, Kg 1,50,000 zet kan thar chhuak thei dawn a ni. Ran vulhtute awlsam zawknan Selesih a AH&VETY farm – ah Thenzawl aṭang hian lak phei dan kan ngaihtuah mek bawk. Tin, mahni a ran chaw hmun siam duh tan a chi leh a phun tur lei theihin a awm reng bawk a ni. Mizo Sial leh Zo Vawk a ral mai lohna tura thawktuten in lo vulh hi thil lawmawm tak a ni, tun dinhmunah Zo- Sial pariat vulh mek a ni a, ti pung zel turin department in hma kan la mek a ni. Hetih lai hian ASF hri avangin Zo Vawk erawh kan chan vek niin ka hriaa pawi ka ti hle, bul ṭan ṭha leh turin hma kan la mek a ni” a ti bawk.
AH&VETY Minister chuan, “State dangin aṭangin Artui kan la lut nasa em em a, vawi leh khatah Mizoramin Artui a mamawh ang zat kan intodelh nghal thei lovang, hma kan la chho zel ang a. Kumin aṭanga bul ṭan turin Arpui, a tui tam chi nuai khat vulh theihna turin hma kan la meka, a hmun hma tur pawh kan nei ṭha a, thawktu kan nei ṭha bawk, Mizoramin bung thar kan kai ngei dawn a ni. Sial vulhtute tan Sial in an Chi liah tur Rashtrya Gokul Mission (RGM) aṭangin siam mek a ni a, hei pawh hi kan tih changtlun zel theih chuan Sial vulhtuten an ṭangkaipui hle dawn a ni. Dilpui kan chei bawl dan pawh mipuiin min fak hle a, Dilpui tlawhtute sum hmun tling khawm hmanga farm in enkawl dan pawh ka fak hle che u a ni. Sorkar department thawhchhuah nei nih te hi a hlu a, dawn beisei rilru ringawt ni lova department inkal hian rah ṭha a chhuah zel ang. Thawhchhuah neih hi hi midang tan malsawmna a ni a, AH&VETY department hi entawn tlak lo ni se, ran vulhtute tan malsawmna leh innghahna rintlak lo ni zel ang che u’, a ti bawk.
Pu C Lalsawivunga hi Thenzawl ZPM hruaitute leh AH&VETY department Addl.Director Pu Sahlu Khaila bakah official dang ten an ṭawiawm bawk a ni.
