Labour, Employment, Skill Development & Entrepreneurship (LESDE) Department leh Tharthilthlentu – Entrepreneurship & MSME Support (TiLi) te chuan Mizorama Entrepreneurship leh Startup lama hmasawn nan leh tih changtlun leh zual nan, vawiin khan LESDE Conference room-ah, LESDE Secretary leh TiLi Chairman ten thuthlung an ziak ho a ni.
He Inremna thuthlung hi kum khat chhung atana ruahman phawt niin Entrepreneur leh Startup-a Mizo Thalai ten hma an sawnna turin LESDE leh TiLi te hian hmalakna an kalpui dawn a ni. He programme-ah hian TiLi Incubator chu startupindia hnuaia awm tura thlanchhuah a nih angin hnathawk tan tura hawnna hun hman tel nghal bawk niin, ISMC Chairman Pu Mark Lalduhsaka’n sawi hawngin,INCUBATION SEED MONITORING COMMITTEE (ISMC) chungchang a sawifiah a, Mizoram Skill Development, Entrepreneurship leh Startup dinhmun-te sawi hona hun neih a ni bawk a ni.
Khuallian Pu Lalramsanga Sailo, LESDE Secretary-in TiLi te chu Entrepreneurshp bika thawhpui tura inremnna thuthlung an ziah pui hmasa ber an nih thu a sawi a, LESDE Department-in Skill Development hmalakna nasa tak an neih te tarlangin, Thalai te tan Skill Development leh Entrepreneurship lama bung thar kaipui turin TiLi-te chu a sawm a, thahnem ngai taka Mizo Thalaite tana an theihna hmangchhuak turin a sawm bawk a ni.
TiLi Chairman Pu LTL Fela chuan, Tharthilthlentu-te hian Mizote hian Mizoram chhung chauh a hma la mai loin, India ram bakah, khawvel huapah pawh Mizo thalaite hian kan thlen phak ve theih thu sawiin, tuna Startup India hnuaia official incubator an nihna pawh ram pawn thleng phak a hman ngei an tum thu a sawi a, LESDE Department nen an thawk ho thei tur hi lawmthu a sawi rualin hmasawnna tha zawk, thar thil thlentu an nih phah ngei a rin thu a sawi a. LESDE Director Pi Angela Zothanpuii pawhin thawhhona duhawm tak an nei thei tur chu lawmawm a tih zia leh an pahnih tan mai ni lo, Mizoram tan bung thar an kai ngei theih a beisei thu a sawi bawk a ni.
