Vawiin khan ZPM chhung inkhawm neih a ni a, Lalliansawta, President chuan Aizawl South III bial atangin mi thar 37 a lawmlut a. Hon.Capt Ngurtaikhuma Sailo chuan lawmluhte aiawhin thu a sawi a ni.
Lalduhoma ZPM leader chuan tun tum Mizoram Assembly Session hnuhnung bera pass tak The Mizoram (Land Revenue) (Amendment) Bill, 2022 chungchang sawiin, “Mipui chanvo atanga chanai neih ve tumna dan a ni. Kan mimal pawisa mizoram sawrkarin heti zat hi kan lo hmang ve ang, tih ringawtna dan hi a huatthlalaa a diklo hrim hrim a, hetiang dan tha lo tak siamtu Congress an ni a, a hmangtu leh a aia nasa lehzuala dahngheh tumtu chu MNF an ni. Heng party pahnihte hian mipui min hmangaih lova, mipui hmakhua an ngai lo a ni,”a ti.
Lalduhoma chuan, “ZPM chuan tuna bill an rawn put luha 75(A) tih loh a dang zawng zawng kha kan pawm vek a. Kha dan pass a niha a that turzia, LSC nei lo pawhin property card te an nei thei tawh dawn a, loan te an la thei tawh dawn a ni, tih te pawh kha a tha. MNF sawrkar siam anga an sawi erawh pawi ka ti a, central sawrkar rawn siam sa an copy mai a ni,”a ti bawk.
ZPM Leader chuan, “ZPM hian duh loh kan nei a. Kan duh loh chu ram neitu ni ve uk si lo politician te, official te, compensation dawng tura an lo inralwh ve thin hi a ni. Dikna kengkawhtu tura kan ngaih kan ram hruaitute compensation dawnna tur lam apianga an kal a, revenue minister hova hetianga an thuneihna hmanga ram neitu ni ten an dawn ve theihna tur kawng an zawng vak hi kan duh lova hei hi kan hua a ni,”a ti.
Lalduhoma chuan, “Lunglei Lunglawnah sawn PWD ram a awm a, an land lease a lo expired tawh a, tunah tihnun tumin revenue office-ah an buaipui mek a ni. Chutia an buaipui mek lai chuan Lunglawn pa pakhatin a mimal ram atan a dil a, kan minister hian a recommend bawk a ni. Kan minister hian PWD hi a chhuhsak dawn nge, PWD tan hian a pe leh dawn. PWD hian an ram an chan dawn nge tih pawh a hriat tawh loh a ni,” a ti bawk.
