‘The Mizoram Land Revenue Amendment Bill’ pawm a ni

Mizoram Legislative Assembly 8-na, thutkhawm vawi 10-na vawiina neih ah Revenue Minister Lalruatkima chuan The Mizoram Land Revenue Amendment Bill House ah pu lut in, sawiho a nih hnu ah Bill hi pawm (pass) a ni.
He Bill ina a tum ber chu Central Sawrkar, Ministry of Panchayati Raj, ina Scheme thar a kalpui SVAMITVA avangin State in kan dan neih siamrem a ngaih avangin a ni a, he Scheme/Policy ina a tum ber chu Thingtlang khua a in leh chenna bakah huan lo ram nei ten an chenna inhmun chu LSC anga Pass pangai an neih ve theihna tur atana ruahmanna a ni ber a, hetah hian LSC tlukpui, Ownership an neih ve theihna atan Property Card pek dan tur a ni. He Policy/Scheme hi Mizoram chhunga thingtlang khaw 48 ah vansanga thlalakna (Drone survey) neih a ni tawh a, reilote ah Property Card pawh pek chhuah beisei a ni. Hemi Scheme/ Policy hian kalphung a neih avangin chumi mil tur chuan The Mizoram Land Revenue Act 2013 chu Amend a ni.
Hemi bakah hian The Mizoram Land Revenue Act, 2013 ina a neih loh, Land Acquisition a lo awm chhoh tak zel avanga Dan bung leh chang belh ngai belh chungchang a ni bawk a, hetah hi chuan Sawrkarin Huan leh Ram nghet lova nei, Periodic Patta, House Pass, Shop Pass, Stall Pass leh Land Lease te hi hmasawnna hnathawh Kawng zauh ang chi, Central Sawrkarin State chhunga hma a rawn lakna ah hian sawrkar ram hunbi(period) neia lo enkawl hawhtu te hian an lo enkawl hmunah Acquisition (ram lak) a lo awm pawh a Land Value ram hlutna an lo lak ve theih dan leh chumi ram atana Land Value (ram hlutna) an lo lak ve pawha a ram neitu leh hman hawh tirtu Sawrkar hnena a ram hman hawh man Sawrkar chanvo ve tur 15% Sawrkar sum bawma a luh ve theihna a ni tih House ah hian tarlan a ni.