Thenzawlah Bekang eisual avangin mi 12 admit

Thenzawl ah Bekang um eisual vangin mi 12 Thenzawl CHC ah nimin khan admit an ni.
Bekang eisual, damdawiina admit te hi Thenzawl Kanan veng vek niin, he Bekang um eisual vanga inentir zawng zawng hi nimin chawhnu lam thleng khan mi 20 an tling a, an zing mi 12 chu Damdawiinah hian admit an ni a, tlema dinhmun ziaawm deuh te chu in lamah inenkawl tura tih an ni a, an bekang um leh Bekang hum te hi hmunpui lamah thawn a, enfiah tur anih thu Thenzawl CHC Medical Officer Dr. Remlalnghaki chuan a sawi.
Thudawnna in a sawi danin, Thenzawl Kanan Venga Bekang um thin chhungkaw pakhat chuan, an bekang um hi Thawhlehni leh Nilaini lam khan an vengchhungah zuar chhuakin, chhungkaw engemawzatin an lei a, heng Bekang eitute hi Nilaini khan insawiselna an nei hlawm a, mahse, bekang eisual tih an inhre lova, thenkhat chuan Covid an nihte an inringhlel a ni. Nilai zan khan Thenzawl damdawiinah mi thenkhat an inentir a, damdawiinah hian Admit chiah lovin, a then riahtir an ni a, nimin lamah Bekang um eisual an nih tih hi hriat a ni a, heng damlo admit te hi a tlangpuiin Khawsik, pumna, kawthalo, BP hniam leh Thawhah te in an awm hlawm a ni. Bekang um tur – Bekang hum hi Burma/Myanmar atanga an lak niin, a hma pawhin an lo um tawh a, hetiang thil thleng hi a awm lo niin bekang umtute chuan an sawi
He chanchin buatsaih lai thleng hian Bekang um eisual nia hriat mi 20 inentir tawhin, mi 12 admit an ni a, hmundanga refer ngai an awm rih lo niin thudawnna chuan a sawi bawk.