Thing deh lama eizawngten Larsap an kawm

Mamit 30 May, 2022 : Mizoram Wood Based Industries Owners Association (MWBIOA) hruaitute chuan vawiin khan Governor Hari Babu Kambhampati chu Raj Bhavan-ah an hmu a. An sumdawnna – thingzai, thingzai leh thing hmanga thil siamchhuah bungraw chi hrang hrang (finished products) te state pawna thawnchhuah kawnga an harsatna te an thlen a. Governor hnenah hian an harsatna te sutkian a nih theih nan hma laksak turin ngenna an thlen a ni.
Governor Hari Babu Kambhampati chuan Mizoramah Industry lian tham awm rih lo mahse, Industry tenau tam tak, sum thawkchhuak thei a tam thei ang bera din erawh a tul a. Hemi atan hian thalai mithiam zawk te entrepreneur ni turin a tam thei ang ber an rawn pen chhuah a ngai a ni a ti a. Mizoramin sum leh paia tun aia a thawhchhuah theihna turin entrepreneur tam tak a mamawh a ni a ti. MWBIOA te harsatna tawh dan te pawh chiang zawka a lo zirchian hnuah Sawrkar laipui lamah a theih anga lo nawr a tum tih a sawi bawk a ni.
MWBIOA lam atang hian an pawl president C.Thanchuanga, Prop, Ceeke Woodworks chuan “Transportation of timber including sawn timber outside Northeast – Necessity for road transport” Tih thupuia hmangin PowerPoint Presentation a pe a. Presentation atanga a landan chuan wood – based industry hi February 2021 atang khan awmze neia kalpui tan niin, tunah hian hetiang Industry hi hmun 12 velah kalpui a ni. Heng unit 12 te hian February 2021 leh tun inkarah GST-ah cheng nuai 77.00 chuang an chhunglut tawh a. Tunah hian harsatna thenkhat an nei mek tih an sawi a. Rel-ah chauh lo chuan an bungraw siam te hi a siamna hmun atanga state pawna phurhchhuah phalsak an ni lo a. Rel a wagon te awlsam takin an hawh theihloh bakah anni ang bul tan tir tan chuan sum senso a sang hle niin an sawi a ni.
Heng an harsatna hi MWBIOA lam chuan Ministry of Environment, Forest and Climate Change hnenah kawngpui pangaia lirthei lian hmanga an phurh phalsak a nih theih nan dil sak turin Governor hi an ngen a. Myanmar atanga Zokhawthar kaltlanga Thingzai phurhluh a nih theih na tur pawhin hma laksak turin an ngen a. MWBIOA chuan Myanmar-ah thingzai thachi tam tak a awm thu sawiin heng thizai te hi Mizoramah lakluh theih tur list-ah dah a nih chuan Mizoram tan sum tam tak a thawkchhuak dawn niin an sawi a ni.