Aizawl, the 28th April 2022 : Vawiin khan Mizoram State Legal Services Authority(MSLSA) buatsaihin Khuangchera Hall, Ailawng-ah ‘Preservation of Trees & Conservation of Forests’ chungchang Seminar neih a ni a. Justice Michael Zothankhuma, Judge, Gauhati High Court, Mizoram State Legal Srvices Authority Executive Chairman ni bawk chu Khuallian a ni.
Justice Michael Zothankhuma chuan thu sawiin mi tinin thing humhalh nachang hriat a pawimawh a ti a. Thing ding sa humhalh bakah a tam thei ang ber phun belh chu khua leh tui tha te tihtur a ni, a ti. Mihringte dam khawchhuahna tura thing pawimawhzia sawiin Justice Michael Zothankhuma chuan thing hian tuihna a siamin a tipung a, mihring leh ransa te tan daihlim min pe a, boruak thianghlim hip tur min pe bawk a, insakna hmanrua leh inchhung bungrua kan mamawh apiang min petu a ni a, thinghnah tla tawihte hi organic leitha siamtu an ni a, mihring dam khawchhuahna atana thil pawimawh ber an ni hial awm e, a ti a. Thing ding sa humhalh a, a tul lovah chuan thing kit lo tur leh a tam thei ang ber thing phun belh zel turin mipuite a sawm a ni.
He Seminar ah hian Gauhati High Court Judge, Justice Ajit Borthakur chu Khualzahawm a ni a. Justice Borthakur chuan Mizoram chu India rama state zinga thing leh mau la nei tha zinga mi nia a hriat thu sawiin a awmsa humhalh leh phun belh zel a nih loh erawh chuan Mizoram hian hmalam hun duhawm tak a nei bik lovang a ti a. Pi Lalrammawii Sailo, Conservator of Forests, Environment, Forest & Climate Change Department chuan thing tangkaina chi hrang hrangte tarlangin paper a present a. Mizoram thing leh maute hi Forest Department chauh chuan a humhalh hneh lo tih sawiin sawrkar hmalakna puibawm turin mi tin a ngen a ni.
