Vawiin May ni 25 nilaini hian Mizoram Pradesh Youth Congress Committee (MPYCC) chuan Thingdawl leh Kolasib Rengtekawn-a Manipur state chhung buaina avanga raltlante awmkhawmna hmun tlawhin, ṭanpuina an hlan. Congress Ṭhalai President Laltawnliana leh a thawhpuite hian buhfai, dal, alu, neutrela, Silpauline, gamchha, damdawi chi hrang hrang leh hman chawp tur toothbrush, toothpaste, sahbawn leh mamawh chi hrang hrang an pe a ni.
Ṭanpuina hlannaah hian MPYCC President Laltawnliana chuan thu sawiin, “BJP hian hnam leh sawkhaw hrang hrang betute inkarah inhuatna leh tharum thawhna politics nasa takin a khel a, chumi rah chhuah avang chuan Manipur-ah nasa takin thisen a luang a. Nunna tam tak an chân a, Kristian-te Biak In ṭhahnem tak hâl a nih bakah in leh lo tam tak hâl leh tihchhiat a ni bawk,” a ti.
“Heti khawpa Manipur-a tualchhung buaina nasa a chhuah mêk lai a, India ram Prime Minister berin ngawih a chuh tlat mai hian BJP kaihhruai NDA sorkarah hian India ram a him lohzia a tilang a. India ram Hindu rama siam tumna kal zel hi kan dan chah a ngai a, BJP kaihhruai NDA zawmtute hi tute nge an nih kan hriat a hun tawh a ni” a ti.
“ZPM hotunu chuan BJP thawhpui an hnial loh thu a sawi a, hei hi a lungchhiat thlak takzet a, an rilru tak tak ni lo se ka duh takzet a ni,” a ti bawk.
MPYCC President chuan, “India ramah sakhaw hrang hrang vuantute leh hnam hrang hrangte inkarah Congress party chuan inlungrualna a zawng ṭhin a, a zawng mêk zel bawk a, tun ṭum Manipur buainaah pawh All India Congress Committee chuan Fact-Finding Team dinin, Manipur state an tlawh a, chuta an hmuhchhuah chu BJP sorkar hian remna leh muanna bakah mipui ten nunphung pangngaia an nun leh theihna turin hma a la tawk lo tih hi a ni,” a ti bawk.
“Zofate hi chhan hrang hrang vangin inṭhen hrang mah ila, thisen-a kan inzawm tlat avangin intuamhlawm tlat zel tur kan ni a. Tin, Zohnahthlak unaute kan insuihkhawm lehna tur kawng hi bumboh hle mahse, tun hun harsa kan tawh angte hi unau kan nih hlutzia tilangtu ni zel zawk rawh se,” Laltawnliana chuan a ti bawk.
Laltawnliana chuan, “India ram hi Pu Nehru-a ten pangpar huan angin an lo tehkhin a, pangpar huanah chuan a huan timawi turin pangpar chi hrang hrang an par zâ thin a, chutiang bawkin India ram tiropui turin sakhaw chi hrang hrang leh hnam hrang hrang kan lengza tur a ni tih hi kan thupui ber a ni,” a ti.
“Kan Zo hnahthlak unau tanpui ngaite tanpui tur hian Congress thalaite chuan Pathian malsawmna kan dawn aṭangin kan theih ang ang kan thawhkhawm ve a, mite angin pek tam tur nei lo mah ila, kan thisen zawm puite kan lainat a ni tih lantir hi kan bat a ni tih hriain ke kan rawn pen ve a ni,” Pu Laltawnliana chuan a ti bawk.
Congress Ṭhalai-te hi an President Laltawnliana hovin mi sawmthum chuang Manipur atanga Zo hnahthlak rawn raltlante tanpui tur hian an thawkchhuak a ni.
Thingdawl VCP TC Lalthangzova hnen atanga thudawn danin, Thingdawl Polytechnic hmunah hian Manipur buai avanga raltan hi mi 124 an awm mek a, an la pun belh zel a rin thu a sawi a. Raltlan te chhawmdawl an kawnga sorkar hmalak na chu duh khawp a la nilo hle niin a sawi bawk.
Rengtekawn VCP Lalruatsanga hnen atanga thudawn dan in, Rengtekawn Community Hall-ah hian raltlan mi 123 an awm mek a, Rengtekawn khaw mi fin engemawzat te nen mi 236 Rengtekawn-ah hian an awm mek a ni.
