Thingpui sawngbawl dan zirhona buatsaih

India Formasa, Angel Business Promoters leh Tharthilthlentu (TiLi) buatsaihin vawiin khan Aijal Club ah Tea Symposium neih a ni a. National Chung Hsing University, Taiwan atanga mithiam lo kal te nen thingpui sawngbawl dan zirhona neih a ni. Hawnna inkhawmah Deputy Chief Minister Tawnluia chu khuallian a ni a, MLA Dr F.Lalnunmawia leh Zothantluanga ten an tawiawm a ni.
Deputy Chief Minister Tawnluia chuan Mizorama thingpui chingtute leh agriculture-a innghat loneitute hmasawnna tur kawng ngaihtuah tura Taiwan atanga lo zin National Chung Hsing University Professor te leh zirlai te chungah lawmthu a sawi a. A bik takin thingpui chingtute tan an tharchhuahte Taiwan thingpui tha mi – premium brand ang tluka sawngbawl dan tur ngaihtuahpuia thawhhona tha tak an nei thei tur chu lawmawm a tih thu a sawi. Tawnluia chuan a bial chhung khaw thenkhat thar chhuah lakhuihthei te ram pawna hralhchhuah a nih dan te a sawi a. Taiwan pineapple cake, khawvel hmun hrang hranga an larpui khawpa tui siamna atan te pawh tangkai thei tur niin chu lamah chuan ngaihtuahna seng turin kalkhawm te a chah a. Symposium neih meka tel zawng zawng te tangkai taka hun hmang a, Mizoram chhunga agriculture-a innghat industry te than len zelna kawngah kawngro a sut ngei a beisei thu Deputy Chief Minister chuan a sawi a ni.
Taiwan atang hian kum 2019 khan mithiamte lo zinin Mizoram atanga thar chhuah thingpui fe zirchiang turin an ramah an hawn a. Anmahni sawngbawl dan anga sawngbawlin man to zawka hralh theih turin an siam chhin a. Tun tumah hian an hmalak tawhna te bawhzui tura lo kalin thingpui tharchhuah tamna khua Biate, Darzo leh Reiek te fanpui an ni. Tea industry chauh ni lo agriculture-a innghat industry dangah pawh thawhho theih dan kawng dap a nih tur thu Formosa Foundation India Chapter chairman Jonathan Lalremruata chuan a sawi a ni.
Programme hi TiLi CMD LTL Fela’n a kaihruai a. Mizoram sawrkar Horticulture Department hotute, Central YMA leh AMFU hotute, Mizoram chhunga agro based entrepreneurs te bakah Sialhawk lakhuihthei chingtute he symposium ah hian an tel a. Taiwan tea ceremony en ho a nih bakah Taiwan Tea Industry thanlen dan ngaihthlak niin Mizoram leh Taiwan-in agriculture sumdawnna kawnga thawhhona an neih theih dan tur te sawihona hun an hmang a ni.