INTAS Foundation leh Haemophilia Society Aizawl Chapter tangkawpin Mizorama Haemophilia natna neite tan vawiin khan Civil Hospital Aizawl Conference Hall-ah a thlawnin damdawi sem a ni a. Damdawi hi a vaiin Rs. Nuai hnih man chuang hu an sem ral.
Thisen khal thei lo natna Haemophilia natna nei hi Mizoramah mi 26 hmuhchhuah an ni tawh a, vawiina damdawi an sem hi Factor VIII a ni a. Haemophilia Society Aizawl Chapter hruaitute chuan a natna hmuhchhuah loh leh Society a awm tih hre lo tam tak an la awm dawn avangin lo ngaihven turin an chah bawk.
Damlote hnenah hian Haemophilia enkawl lama thiam bik Nurse Gloria Lalnunfeli, ZMC chuan damdawi inpek dante entirna a nei a. Ani hian a mamawh apiang tana biak turin a phone number a pe bawk.
Damdawi man tumtu pawl INTAS Foundation, Project Associate Aizawl, Dr. Vanlalawmpuia chuan Mizoram bikah INTAS Foundation chu nikum April-a bulṭan a nih thu a sawi a. Corporate Social Responsibility niin, Zemabawk Venglaiah Cancer veite khualbuk, India khua leh tui tana ei leh in a thlawn veka thlen theihna an nei bawk tih a sawi.
Cancer veite khualbukah hian choka a awm a, mutbu leh engkim a thlawna hman theih a. An hmunpui hi Gujarat a ni a, India ram state tinah INTAS Foundation hi lian tak tak a awm a ni.
