October ni 29, 2022 (Inrinni) khan ‘Aizawl North-I MNF Block Conference’ chu Durtlang Leitan YMA Hall-ah neih a ni a. He huna khuallian MNF President Zoramthanga, Chief Minister chuan North-I bial huam chhung Unit hrang hrang atangin Voter 315-te chu MNF-ah a lawmlut.
Thusawiin, Zoramthanga chuan, vawiin kan Block Conference chu kan kal thain, kan inlawmtut thahnem a, a lawmawm hle a ni. MNF-ah chuan senior leh junior tumah kan awm lo, Mizo kan niha hnam rilru nen kan lo pian chhuah hian MNF rilru pu sa vek kan ni. A kum lama upa a piang MNF-ah chuan mi senior kan ni mai a ni. Nakkum November thla tawp lamah inthlan kan lo hmachhawn leh dawn ta a, kan inbuatsaih mup mup mek a ni. Tun sorkar term-ah hian Covid-in hun engemaw chen min nuai a, dan pangngai angin sorkar a kal thei lo a, kan hre vek a ni. MNF Lungphum inrem chhoh dan hi hre lo tam tak kan la awm mai thei a, Mizo hnam hi Pathianin min siam danah a makin a danglam bik em em a, chhak lam atangin Burma ram zawl thla kan kal paltlang thla a, thlang lam phai ram tha thleng thla lovin Mizoramah kan tawp ta chat a. Pathianin ‘ram ka la entir turah khan kal rawh’ a tih angin, kan awm thlap a ni. Tuifinriat ral atanga sap mingo lokal tur kha, kan mi hmasa Pu Darphawka sawilawk ang khan a dik a. Zoram min rawn awp ta a, Missionary an lokal ta a, kum 50/60 chhungin Kristian za a za kan ni nghal a, India rama kristian percentage-ah a tha ber kan ni. Kum 1959-ah Mautam a lo thleng a, Femine Front atangin bul kan intan a, kum1961-ah MNF a lo piang a, chu mi hnuah hnam thuthlung avangin kum 20 zet ram hnuaiah kan awm a ni, a ti.
Chief Minister Zoramthanga chuan, “Kum 1966-ah India chu ralthuam nen an rawn che tan a, Khatih laia Assam Chief Minister Chaliha khan Sipai a rawn tirlut lui a, titawp turin Pu Denga’n a zu bia a, Chaliha chuan ‘kan rawn tirlut lo theilo a ni’, a ti a. Pu Denga’n biak nawn a tum leh pawhin a lo be duh ta lo a, MNF lam pawh kan theih ang angin kan lo inbuatsaih ve ta a ni. Kan han buai ta tak tak kha, a hnuah Chaliha pawhin sipai a rawn tirh luh kha, ‘engin nge min mawlh?’ tiin a inchhir hle thu a sawi a nih kha. Kan ram hi Pathianin thisena baptist turin rem a lo ruat zawk a ni. Chaliha thinlung sak tlat kha Pathian hnathawh a ni zawk a. Inremna kan neih kha India ramin remna a siam tawhah a la hlawhtling ber a ni. Mizo Kristiante hi hun hnuhnunga chanchintha hril turin min ruat a ni,” a ti.
Pu Zoramthanga chuan MNF-in inthlan hrang hrang kan hmachhawn tawh dante sawiin, “Kum 1998-ah PC nen tang dunin MNF-in MLA seat 21 kan nei a, hneh takin kan sorkar a. V/C Election-ah PC khan Congress a thawhpui avangin kum khat vel kan sorkar hnuah kan thawh dun a rem ta lo a. Kum 2005-2008 a malin kan sorkar leh a. 2008-ah Pathianin min paih thla leh a, kum 2013-ah Congress an sorkar zui leh a ni. Zu an zuar ta mup mup mai a, Delhi lamah kum 2014 inthlanah namen lovin an tla leh a. Kum 2018-ah chuan Zoram mipuiin nasa takin an paih thla ta a ni. Nakkum inthlanah hian Congress hian MLA pahnih thum bak an neih ka ring lo. Thisen tam tak tak chhuaka hreawm tam tak tuartute hi nakkum inthlanah Pathianin Puan var min sintir leh ang. BJP hian MNF min bei vak vak a, keini chuan beih let enah kan en lo. PC lah sawi tham an awm lova. ZPM lah hi Rimenhawii’n ‘Hming lem, hming lem ka nei lo’ a tih ang deuhin hming an ngah tawh a, an hming hi a tam tawh lutuka sawisual palh pawh a hlauhawm a ni. An leader Pu Duhoma pawh kum 34 zet a lo bei tawh a, anmahni party din ngei pawh an kalsan leh zel a, tun thlengin an la hlawhtling thei lo. Kum 2018 inthlan khan ‘kohhran Unit-ah kan hmang’ an ti a, Chief Ministerial Candidate an nei a, Congress leh MNF chuan hetiang hi kan nei ngai lo, thil chiang sa a awm reng a ni. Tunah chuan a hmaa an sawi ang khan an awm tawh lo a, Party-ah an in register ta a, Unit neih a tullo titute kha tunah chuan Unit neih tumin an che char char ta a, an nihna dik tak a lolang ta a, mipuiin an nihna dik tak kan hre chiang ta a. Inthlan hmasaka an dinhmun kha an pha tawhlo nasa khawp ang. Hetiang, Tui anga nghet lo kutah hian kan Pathian hian rorelna a dah ngai lo ang. Pu Duhoma hian kum 34 chhungin MLA 7 bak a la nei lo. Hei hi a mimala ka sawisel vang a ni lo, thudik awm sa, mipuin an hriat sa a ni a. Varhparh Arsi hi a eng zual zel ang a, Pathianin kan kutah sorkarna a dah leh ngei dawn a ni,” a ti bawk.
