Zo Reunification Organization (ZORO)M chuan thuchhuah siamin, “Manipur-a Zofate tih chimih leh nuaibo tumna kal mek chuan thla hnih a lo pel ta a, he hmalakna tenawm tak hian kian zai reng a la rel lo a ni. Zo Reunification Organization (ZORO) chuan heng te hi khawvel mipui hriatah sawi ngaiin a hria a ni,” tiin a hnuai a mi ang hian thuchhuah an siam.
1. Thla hnih kal ta chhung khan Zofate leh Meitei te hi an inthen fel thlap tawh a ni. Rilruah an inpawh lo mai ni lovin an inhlat tial tial a, engkimah ramri a inkham fel ta a ni ber a, inremna kawng hawi turin hmalak ngaihna a la awm thei lo a ni. Hei hi Zofate leh Meitei te ram inrelbawlna pakhat hnuaia dahkhawm reng tum chu thil theih a ni lo tih a ti chiang hle a ni.
2. Meitei Chief Minister leh a thawhpui Minister leh party lama mite, tin, Meitei khawtlang hruaitute thusawi atangin Zofate leh Meitei te hi inrema chenho an duh lo va; a chhe thei ang ber a puhin an ram va chuhpuitu leh dan lo va pem lut tia dawta puhin nuai chimih an tum chhunzawl zel a ni.
3. Manipur sorkar, police leh civil lam ni se Meitei thuhnuaiah vek an awm a, anni lahin inthup lovin Zofate chu nasa takin min bei mawlh mawlh a ni.
4. Dan mumal a awm lo va, thil nihphung a buai vek a, hmun hrang hrang atangin India sorkar hian thuneihna la mai se tia rawtna a awm reng chungin Biren kaihhruai sorkar chu a la ding nghet tlat a, Meitei mipui pawhin an thlawp tlat a ni. Hei hi Zofate tan chuan Meitei nena rorelna intawm a beidawnthlakzia a tilang chiang hle.
5. Meitei ho heti taka nunrawnga an che a, Zo tlangval David Thiek (Hmar) a lu an tana Biakin bula an tar leh a taksa chan sawm a diriamna hlei hluaka an sawisa hi Zofaten entika mah an theihnghilh tawh dawn lova chuvangin Meitei leh Zofate hi sorkar pakhat hnuaia awm ho thei kan ni tawh lo a ni.
ZORO chuan Manipur-in a awp mek Zofate a hnam anga nuai bo an tum mekna atanga damkhawchhuak tura an beihnaah leh Manipur rorelna laka la hrang tura India sorkar an ngen mek hi a thlawp a ni tih hi kan puang nawn leh a ni. Khawvel hmun hrang hranga Zofate hian tuna Manipur state hnuaia Zofate beihna hi an thlawp reng dawn tih hi ZORO chuan a chiang a ni. Hetiang thlawpna an hmu thei hi lawmawm a ti hle bawk. Kan tanrual chuan engkim kan ti thei a, kan ti bawk ang. Lalpan min pui rawh se.
