Vawiin Febuary 5, 2025 (Nilaini) hian MPCC President Pu Lal Thanzara chuan Village Council inthlan inbuatsaihna hun hmangin Thingdawl, Bualpui, Kawnpui leh Lungdai khuate a tlawh a. ZPM, MNF leh Neutral atangin Congress party zawm tharte a lawmlut nghal bawk.
MPCC President Pu Lal Thanzara chuan, “Kolasib tlangdung leh Mizoram hmun hrang hrangah ZPM sorkarin kan lei sak ang che u, an tih thlai chingtuten an thlai chin sorkarin a rate an tihchhiat sak vek avangin Hmunphiah an hralh thei lo a. Chutih laiin ZPM sorkarin buhfai za-ah za an tih to avangin ration buhfai lakna pawisa pawh nei lovin mei-alh enin an awm a. Lalna leh thuneihna chan an duh avanga Mizoram mipui bumin retheihna khurah Mizoram mipui an hruai lut a. An nawmsakna atan mirethei te lu chunga vaivut pawh an it tawh a. Ram mipui manganga rum tirtu ZPM sorkar hian miretheite enkawltu Pathian pawi an sawi a ni,” a ti.
Pu Lal Thanzara chuan, “Thil reng reng a chhe thei ang bera chhuah a, sorkar kal tawhah kawng a chhia tia phun phun thin ZPM sorkarah Thal laia lirthei neitute nawrh ngai khawpin kawng a chhia tih sawiin, Mizoram mamawh lakna kawng a chhiat em em laiin Kuhva leh ruihhlo tawlhna kawng erawh a tha em em si hian sorkar kal sual neih pawizia leh mangan thlakzia a tichiang hle a. Hna pawh thawk hman lovin thu belhchian dawl lo an sawi tam lutuk sawifiah reng rengin an hmanhlel mai mai a ni,” a ti bawk.
VC leh Local Council tha kan neih a ngai tih sawiin, Pu Lal Thanzara chuan VC tha kan neih loh chuan khawtlang tha kan nei lovang. Khawtlang tha kan neih loh chuan chhungkua leh Kohhran nun thlengin kan tuar dawn. ZPM sorkarin an duh duha an kawih hera an in haivur bikna tur an duh avanga khawtlang roreltu te inthlan lo ngai ta hian Congress Party min kai harh a, ZPM leh MNF unau te’n Congress Party nasa takin an zawm phah ta zawk a. Pathian rorelna felzia Congress Party-ah a lang a. Congress Party Mizoram enkawl turin mipuiin an pan khawm chur chur a, tun atanga rei lo teah Mizoram mipui tan hna tha kan thawk leh dawn a ni, a ti bawk.
