MPCC-a Legal Department Chairman/PAC TT Zothansanga, Ex-MLA chuan vawiin khan Aizawl Press Club-ah chanchinthar lakhawmtute kawmin, “July 25,2025 khan Aizawl khawpui veng hrang hrangah Samthang Zikhlum YMA ten zawrhna hmun siam sakin, a lei tur pawhin veng chhung mipuite an ngen a, aurinna hmang pawhin vawi duailo YMA ten lei tura ngenna an ti chhuak a nih kha. Hetia kaichhan sawm meuhva an thlai thar te tihral a lo ngai ta hi kan sawiho dawn a ni.
“A hmasain kan rama sorkarna changtute Manifesto, thlai thar chungchanga an tarlante kan lo bih hmasa ang a.
ZPM Kalphung thar Manifesto August,2022 copy 10000
Chapter 1 Agriculture & Allied Sector
Sector 4 – Horticulture
2. Thlaichin uar tur thlan : Mizoram pawna thawn chhuah chi leh Mizoram chhunga eirual tur te chin a, intodelh tura hma lak a ni ang. Thlai thlan bik (Priority List) hetiang hian siam a ni.
(h) Zikhlum
3. Kalpui dan tur :
a) Heng thlaite hi a rate fel fai tak sawrkarin a siam lawk ang a, a tul ang zelin a chi pawh a ngaihtuahpui ang.(Rate siam lawk a ni lova, a chi hi sorkarin a ngaihtuahpui lo bawk)
b) Thlai leh thei tharte ram pawna thawn chhuah leh ram chhunga hralh dan tur a tahtawlhin sorkarin a ruahmanpui ang a, a tul dan azirin MSP a ruahman ang. (Thlai thar hralh dan tur sorkarin a ruahman pui lova, MSP hi a pek thu hriat a ni lo bawk)
c)Vegetable supply chain felfai taka siam a ni ang.(Hei hi siam a ni lo)
d) Crop Insurance kalpui a ni ang.(Kalpui a ni lo)
“Congress sorkarin 1989 ah NLUP a sem atang khan kan lo neituten phurna nasa tak an nei a, thlai thar lamah intodelh tumin mi tam takin hma an la a, tam tak an hlawhtling a, hetia thlai thar a lo pun takah hian kan sorkarin Agriculture produce chungchangah mumal taka kalpui kha tha a ti a, ruahmanna a siam ta a ni.
“Kum 1990 chho khan Iskut chungchangah a chingtuten harsatna an tawk a, vai sumdawng hausa hovin an experience nate nen kan lo neitu chinchang hre tam lo te an dawrna kawngah Congress sorkarin enpui leh kaihhruai an tul tih a hria a, tichuan “The Mizoram Iskut (Restriction on Movement Beyound Inner Line) Order 1991” dan an siam a, hei bakah Trade and Commerce Dept in kan thlai thenkhatte Mizoram pawn lam kal tur tan Notification hrang hrang te an lo issue tawh bawk thin a, a vil reng a, a tul angin Order/Notification Loneitute humhim turin a lo chhuah fo tawh a ni.
“Mizoram chhung ngeia Mizoten kan thlai thar loneia eizawngtute hi thlai lama sumdawngtu, Market Compettitor ten an rahbehna lak atang humhim te, kan thlai thar ram pawna sorkar hriatpui lohva a liam thinte chu ven a ngai tih a hria a, chuvangin Section 7 of the Bengal Eastern Frontier Regulation 1873 (Regulation 5 of 1873) behchhanin, “The Mizoram Agricultural produces (Restriction on Movement) order 1994 chu Congress sorkar lai khan chhuah a lo ni leh ta a, Gazette Vol XXIII dt. 14.12.1994 Issue No.233 ah chiang takin tarlan a ni.
“He order ah hian a hun laia thlai ngaihtuah ngai bik, Iskut, Hmarcha, sawhthing, chhawhchhi leh La (raw cotton) te a huam a. Heng thlaite hi sorkar hriatpui lova ram pawna hralh a remti lova, a chhan chu Vai sumdawng experience ngah tawh lutuk ten kan mite an lo bum te a hlauhawm a, sawrkarin permit mumal taka a siam hnuaiah erawh hralh theih reng a ni. Mizorama chengten Kg 50 chin eichawp atan vawikhata ken theih a ni a, zin veivak ten an bungraw zingah kg.10 aia rit lo an keng thei bawk a ni.
“He order siam a lo nih takah hian Iskut chungchanga order, “The Mizoram Iskut (Restrictions on movement beyond Inner Line) Order, 1991 leh thlaidang zawng zalen taka vahpui vel khapna dante kha sut a lo ni a, He Order huam zau zawk hi kan Loneitu taima te tan hman a lo ni ta a ni.
“Dan siam hi vawikhata a famkim nghal vek thei lo” tih ang deuhvin, hun a lokal a, practical thil thar tam takte a awm thin avangin Dan chu her danglam a ngai thin. Chutiangin 1994 a dan siam pawh kha a pawp ngai leh thawm ngaite a lo awm a, tichuan changtlung zawkin amendment hmangin dan hmasa chu kum 1999 ah tihdanglam a rawn ni leh ta a. “The Mizoram Agricultural Products (Prohibition on movement (Amendment) Order 1999 chu chhuah a lo ni leh ta a ni. He dan hi BEFR 1873 tlawh chhan anih bakah, Art 46 of the Constitution r/w Art 37 tlawh chhana Governor in dan a siam a ni.
“Kum 1994 a dan siamah kha chuan Mizorama thlai thar a duh apiangin an nawm an maka ram pawna an sumdawnpuina kha venpuina/khapna a ni ber a, he dan tharah hi chuan ram pawn atanga thlai lo lut sawrkarin a duh anga a lo control theihna a ni tel ta thung a, a lut/chhuak ah sorkar hriatpuina fel tak a ngai tihna a ni. Tichuan he dan tlawh chhan hian Agricultural products sumdawnna reng reng State sorkarin tul a tih angin a control thei ta a ni. Checkgate pawh Vairengte, Bairabi leh Kanhmun ah te siamin, atulna hmuna siam belh zel theihna a ni. He dan 1999 ami hian 1994 a lo chhuah tawh chu a sut ta a ni.
Kum 2023 inthlan dawn campaign lai khan kan ruling ZPM te hian na takin Congress min bei a, Thlai thar ram pawna hralh phallo leh thlai thartute rap bet hial angah min chhuah a, he order, “The Mizoram Agricultural Produces (Restriction on Movement) Order 1994 hi a chhung thu, content hre si lovin thiam tak leh uar takin an sawi a. Congress te kha kan insawifiah zo lo a ni ber e. Kan han bih chiang a, Congress a kan hotu hmasa te hmathlir thui zia leh Loneitute an ngaihsak zia, vai sumdawng duham tak takten an nawm an maka an inrempui na thalo tak tak atanga venpuina a lo ni a. Chubakah inthlan dawna an sawi kha chuan dan thi a lo ni daih tawh a ni, 1999 a miin a luahlan tak vek avangin. Kan ram hruaitu hmasate kan chhuang hle a, MLA an nihna, dan siam tura thlan an nihnaah khan an lo chiang hle a lo ni. Congress khan kan term hmasa khan kum 2 leh a chanve chhungin Assembly ah Dan 53 kan passed hman a ni.
“July 17 khan Chhungkaw thila Vanzau ka tlawh pahin Samthang ah ka kal a, Zikhlum neitute an lo mangang hle mai. Anhralh theihloh avanga tam tak tawihral te, a then chu Vawk chaw atan bag khat Rs.300 a hralh te, tihngaihna hriat loh avanga leitha atana satsawm te an lo awm a, Aizawl lamah YMA branch hrang hrang tanpuina dil an tum thute an lo sawi a, an khawngaih thlak takzet. A hnu July 25 khan Aizawl veng hrang hrangah YMA chuan an lo zawrhpui a, Qtls 350 zet an lo tihral sak a, an lawm hle nghe nghe a ni. YMA te kai chhana sawm tul khawpa kan lo neitute manganna ang hi Mizorama la awm ngailo a ni.
“Samthang ah In 145 in an ching a, Khankawnah In 111. Khilai East Tuipui bial khaw hrang hrangah khian In 400 chuang in Zikhlum hi inghah nan an hmang a, an vaiin Zikhlum tiak Nuai 30 vel an phun a, thar chhuah tura an beisei chu Qtls 10000 chuang zet niin, a tawih chhia, hralh theihloh hi Qtls 1300 zet a awm a, hralh tur an la ngah hle a, sorkar a chet vat a ngai a ni. Khilai Samthang leh a chheh vel bakah khian Zoram hmun tam takah Zikhlum hi chin a ni a, kan thlai chingtute hian an thawhrim rah, an thlantui chhuaka an buaipui hah man hi a nihna tur ang taka an tel ve hi an phu em em a ni.
“Tunah khian tam takin Zikhlum chi an kui mek a, phun mekte pawh an awm a, Khankawnah te phei chuan Zikhlum chingte chu lo pangngai an nei thei bawksi lova, an ngaihtuahawm hle. Samthang lam hotuten an hralh theihloh avang a an mangan vangin sorkar hotu lian Minister 4 te an hmuhin, “kan ngaihtuah dawn nia” tih bak chhanna an hmu lo. CM zahawm tak pawh an hmu a, Trade & Commerce Director lamah zawtin, phai lam zikhlum a tlem thei ang ber luhtir turin a ti nia hriat a ni.
“Kan sorkar hian an campaign lai atangin Loneitute duhdan an hria a, research base a engkim kalpuiin, Manifesto ah a rate siamsak te, thlai chi ngaihtuah pui te, ram pawna thawnchhuah leh ram chhunga hralh dan tur sorkarin a ruahman pui te, a tuldan azirin MSP ruahman sak bawk te, vegetable supply chain felfai taka siamte, crop insurance kalpui te kha a awm vek a, He an Manifesto Chapter 1 Sector 4 Horticulture tih hnuaia N.2 leh 3 te hi kalpui hun tak a ni a. Zikhlum bik hi chu Chapter 1 Sector 43, 2(2)(h) ah a chuang vang a ni.
“Tichuan, “The Mizoram Agriculture Products (Prohibition of Movement)(Amendment) Order, 1999 hmang hian kan sorkar chak tak hian Loneitute leh zikhlum zuartute te nena inbe rawnin, Order siam sela, tawngkama rawn lut tlem tura Director leh duty te kuta dah mai lovin, Vairengte leh hmun hrang hrang atanga zikhlum lo lut tur khapna dan hi chhuah sela, thingtlang lama kan loneitute chuan an lo hralh ve thei tawh ang a, an thawhrim rah a takin an seng thei tawh dawn a ni. He hun ropui tak hi kan loneitu thawkrimten dingdihlipin an thlir mek a ni.
“Tuna kan sorkar hrawn mek hi thlai thar buaipui chungchanga beiseina sang tak nena Zoram mipuiin kan thlan an ni a, thlai thar leh hralh chungchangah hian tun angin harsatna hi kan tawk ang tih tuman an ring ngailo. Leina tur D-A-H te kha a ri ring hle a, An han sorkar a, kum 2023-24 budget a thlaithar leina tur Rs.Vbc 110 an han dah phei kha chuan ropui tak a ni ringawt. Mahse tun kum 2 chhung, 2024-25 leh 2025-26 Budgeta thlai thar leina tur an han dah ta lo kha chuan a thlangtu mipuite a hawisan chiang hle a ni. Congress leh MNF kan sorkar laiin hetiang taka harsatna nasa hi kan la tawk ngai lo, a chhan chu tihtakzeta mipuite hmakhua kan ngaihtuah thin vang a ni.
“Sorkar hian tunhma lama sorkar lokal tawh ten kan ram himna tur leh kal zel dan tura dan an lo zam te hi uluk takin zir se, a tulna apiangah awmze nei takin hmang tur pawh an ni,” a ti.
