13th March, 2022 : Tukin khan Suangpuilawn ram Rungdil bula Pu Lianchhunga huan thlam kangah mi pathum (3) an kang hlum nia thudawn a ni.
Thu dawn danin, tukin zing dar 4 vel khan kang mei chhuak hi hriat a ni. Huan neitu Pu Lianchhunga hi Aizawl Ramhlun South lam mi a ni a, a huanah hian a khawsa tam hle a, tunlai tak hian a huanah a awm lo a ni.
He huan hi uluk taka enkawl niin thlai chi hrang hrang baka sangha dilte a awm a, ran an vulh bawk. Pu Lianchhunga bakah a fate; Pu Lalmuankima (Mka) SAMGRA hnuaia Project Engineer thawk mek leh Pi Vanlalruati Ralte ZEDA lama officer te chuan he huan hi an enkawlpui ve bawk a. Solar power te TV leh Fridge te nen an huan thlamah hian an nei a ni.
Thlam hi a chhawng niin nizan khan inhnuai lamah Chowkidar Pu Vanlalmawia (VL-a) kum 58 mi East Phaileng khua leh a fanu kum Zorinmawii 14 mi vel an riak a. In chung lamah Pu Lalmuankima (Mka) leh a fapa David Lallawmzuala(14) leh an nau Isaak Lallawmzuala(28) te an riak.
Davida chuan zing dar 4 velah lirnghing anga ri deuh dawt dawt a hria a, Isaac-a chu a kaitho vat a. Ri a nasat avangin an chiai ve hle a, kawngkapui lamah chhuah mai an han tum chuan meialh nasa avangin chhuahna chi a lo ni tawh lo va. Davida pa Pu Lalmuankima room hranga riak chu an han au thin a, an au harh zo lo. Kangmei a chak em em a, tukverh lam atangin an insasenga pawn lamah an chhuak thei hram a ni.
An thlam bulah hian Bolero an dah a, a kang chhe nasa hle. Thlam hnuai lamah hian Eirawng bawlna gas leh oil te an stock a, dragon fruit zamna tur tire tam tak an lak khawm an dah bawk a, huan zauh an tumna lama an teak huana teak thing an kih, an zai sa an dah hnem hle bawk.
Heng thlam chhung leh hnuai lama an thil dah khawmte hi a han kan takah chuan a kang na em em mai a, mitthi pathum; Pu Lalmuankima (Mka), Pu Vanlalmawia (VL-a) leh a fanu Zorinmawii te hi an ruang atang chuan tute nge an nih hriat theih rual a ni tawh lova, an thlam in awmphung leh ruang awmnate atangin ruang hi tute nge an nih hriat hran theih an ni.
Chanchin buatsaih lai hian Saitual Police te kangmei chhuahna hmun hi an thleng fel ve chiah a, inquest leh tih tur tul angte an buaipui nghal a ni. In kan chhan hi hriat a ni lo.
