April thla bul atanga to thli tleh, rial nasa tak tla leh ruah sur avang khan tun thlengin Mizoramah in 1,400 ai a tlem lo a chhe tawh a, a then chu luah tlak loh khawpa chhia a ni a. Nizan lam pawh khan Chawngtlai leh Vanbawngah te pawh Thli leh Rial thawk hian In tihchhiat a nei nual a ni.
Rial tla, thlipui leh ruahsur-in a tihchhiat hi kar kal ta Ningani hma zawng kha chuan Mizoram hmar chan lama district 4 chauhah a ni a. Ningani khan chhim chan lamah ruah a sur ve tan chauh a ni. Chhiatna thleng hi dawn belh zel a ni a. Ningani (May ni 2) khan rial tla, thlipui tleh leh ruah surin Mizoram district 10-ah chhiatna nasa tak thlenin in 580 ai a tlem lo a tichhia ni-in thu dawn a ni a. Khawzawl district-ah in 128 a tichhia a. Khawzawl district-ah hian Sialhawk khua-ah in 68 rialin a deng chhia a, chumi zinga in 5-te chu luah zui tlak loh a ni a. Tlangpui khua-ah pawh in 55 rialin a deng chhia a ni. Sialhawk khua hi lakhuihthei leh serthlum thar tam khua an ni a, an lakhuihthei leh serthlum a deng chhe nasa hle a. Khawtlang hruaitute chuan kuminah thei an thar tam thei dawn lo niin an sawi a ni.
Lawngtlai district pumpui-ah in 209 vel a chhia niin report a ni a. Lawngtlai distric thenawm Siaha district-ah chuan in 69 a chhia a, Aizawl district-ah pawh in 40 a chhia a ni. Mamit district-ah in 29 a chhia a. Saitual district-a Ningani (May ni 2) chhawhnu lama thli, ruah leh rial rawn thawk avang khan N. Khawlek khua chuan chhiatna nasa tak an tawk a. Rial tla hian inchung rangva a deng chhe nasa hle a. Rial tla hi artui ai pawh a lian zawk a ni tlangpui hlawm. Inchung 90 chuang deng pawpin in 5 chu luah zui tlak lohvin a dengchhia a, in chung zawng thlak vek ngaiin a awm. Inchung zatve vel thlak ngai hi in 40 bawr vel an awm a. In chhe nasa lutuk lo, thlak neuh neuh ngai tur chi hi in 50 vel an awm bawk a ni.
Zirtawpni khan N. Khawlek khawtlang chuan hnatlangin chhiat tawk te inchung thawm that hnatlang hi a theih ang angin an thawk a. Nimin khan khawtlangin hnatlang hi an huaihawt chhunzawm a, In tin atangin a pachhuakin hnatlang hi koh a ni. Champhai district-ah pawh rial tla leh thli tleh hian chhiatna nasa vak lo chu a thlen a ni.
Ningani-a thli leh rial thawkin Lawngtlai District chhunga Hmawngbu leh Tuithumhnar khuaa chenna in a tihchhiatte chu nimin khan Lawngtlai District Bawrhsap Pu Cheemala Siva Gopal Reddy chuan a hmunah tlawhin a enfiah.
Lawngtlai Bawrhsap hi Lawngtlai District SP Pu R. Lokeshwaran, Election Officer Pu Denny Lalchhuanawma, Lawngtlai Block Development Officer Pu Collin Hlychho, DIPRO Pu C. Lalhruaitluanga leh chanchinbu mite’n an ṭawiawm a. Village Council leh tlawmngai pawl hruaitute nen thli leh rialin chenna in a tihchhiatte chu a hmunah tlawhin, thawm ṭhat dan tur ruahmannate an sawi ho va. Bawrhsap chuan thli leh rialin chenna in a tihchhiatte chu sawrkar aṭanga chhawmdawlna leh ṭanpuina awm thei angte ngaihtuahsak an nih tur thu a sawi a. Rialin an in chung rangva a den chhiatte hnenah a nih tur anga ṭanpuina pek theih hmaa an lo khuh lailawk na’n silpauline a hlan nghal bawk a ni.
Hriat theih chinah Ningani a thli leh rialin chenna in a tihchhiat hi Lawngtlai District-ah 209 awmin, chu’ng zinga 62 chu raltlante chenna in/buk a ni a. Khaw malkhaia in chhia tamna ber chu Tuithumhnar niin, chenna in 76 (raltlan in 18 telin) a chhia a. Chamdur P-I-ah in 25, Vawmbuk-II-ah in 24, Vaṭhuampuiah raltlan chenna in 21, Hmawngbu-ah in 12, Lunghaukaah in 10 leh khaw dang pariatah belh khawmin in 41 a chhe bawk.
Lawngtlai District Disaster Management Authority (DDMA) aṭangin thli leh rial vanga chenna in chhiat dan hi DM&R Department-ah preliminary report thawn tawh a ni a. A chhiat dan dinhmun kimchang nen report thawn leh tur niin, a in chhiat dan azirin sawrkar aṭangin chhawmdawlna leh ṭanpuina hi pek tura ruahman a ni.
Thli tleh leh ruah sur hian kawlphetha semna hrui engemawzat hmun hrang hrang a tihchhiat bakah kawngpui engemaw zat chu leimin avangin lirthei kaltlang theih lohvin a awm bawk a ni.
