ZPM Party Thalai chuan thuchhuah siamin, “Aizawl North II bialtu Dr.Vanlalthlana’n a MLA Fund a hman danah, MNF party Media & Publicity Department General Secretary V.L Krosshnehzova chuan ni 1.6.2023 khan thu thar theh darhtute kawmin, thu belh chian dawl lo leh thu dik hai derin Aizawl North II bialtu MLA Dr. Vanlalthlana a bei a, hei hi a chhan ber chu Pu V.L Krosshnehzova hian MNF ticket-a Ṭawi biala din a beisei avângin a thiam ang angin lar a khel ve-ah ZPM Ṭhalai chuan a ngai a; intheh lâr a tumna-ah hian dawt thu leh thu belhchian dawl lo pawh a pawisa lo tih hi Zoram mipuite hmuh dan a ni.
“Dr.Vanlalthlana hian a bialah hian implementing agency atan dan hnuaia society registered thlap, Aizawl North Development Society (ANDS) chu ni 23.2.2022 khan MOU ziah puiin, mipui hriat theih turin TV leh chanchinbu lamah pawh pekchhuah a ni. Implementing agency ruat a nih danah hian MLALADS (MLA fund) kaihhruaina dan engmah kalh a awm lo. Dr. Vanlalthlana hian veng tina Local Development Committee WhatsApp group-ah, an veng chhunga sanction a siamna lehkha chu a tarlang nghal zel a, Dr.Vanlalthlana’n MLA fund a hman dan a puangzar zel ang hian MNF MLA-te hian an puangzâr ngam ve em? tih hi kan zawhna a ni.
“ZPM Ṭhalai chuan Dr. Vanlalthlana aia NGO leh Sporting Club hnena MLA fund pe hnem MNF MLA zingah an awm a ring lova, NGO leh Sporting Club hruaitute leh member-te’n ngaihsaktu an neih avanga an lawm viau laia, bialtu MLA-in anmahni a hnuai chhiah ang a Pu VL Krosshnehzova’n a tarlang ta mai hi NGO leh Sporting Club-te hmusitna-ah kan ngai a ni. Pu VL Krosshnehzova’n Ramhlun South YMA Y-Section hna chungchanga Dr.Vanlalthlana a neihna pawh hi hre reng chunga mimal inbeihna-ah ZPM Ṭhalai chuan a ngai a, kha thilah khan file a kal thui hmain Dr.Vanlalthlana hian a cancel vek a ni.
“ZPM MLA-te leh Corporator-te MLA fund hman ṭhat danin tun MLA term leh AMC term-ah hian Zoram a tuam chhuak mêk a, ZPM MLA leh corporator-te’n MLA fund hman kawngah ZPM a sawrkâr hma hauh aṭangin kal phung thar an thlen a ni tih hi Zoram mipuite’n an hria a ni.
“ZPM-in inlungrual taka bial 35-ah bial viltu a ruat theih laiin, sawrkârna chelh mêktu MNF party-in candidate tifel thei lo khawpa ZPM bial viltute an huphurhna hi a rawn irh chhuak mek a, an party chhûng buaina ching fel lova party dang beih an tuipui ber a nih chuan an buai zuai zêl ang tih hi ZPM Ṭhalai dinna a ni. MNF party hian sawrkâr hun chhûng an la neih thla 5 vel, hun tawite-ah hian opposition nih dan an lo inzir lawk niin ZPM Ṭhalai chuan a ngai a ni,” an ti bawk.
