Cyber Crime Police Station (CCPS)-in kumin chhungin internet hmansual kaihhnawih thubuaiah mi 11 an man tawh.
CCPS hotute hnen atanga thudawn danin, kumin January ni 1 atanga tun thla ni 7 thleng khan thubuai 21 an ziak lut tawh a, hemi kaihhnawihah hian mi 11 an man tawh a. Heng thubuai an ziah luh zinga tam ber chu sum kaihhnawiha inbumna a ni a, a dawttu chu hursualna kaihhnawiha inbumna a ni a; a bak thubuai dang chu mi nihna ruksaka pawikhawih nana hman te, a neitu emaw a siam chhuaktu emaw phalna la hmasa loa video thehdarh thubuai te, hacking leh thubuai dangte a ni.
CCPS hian kum 2020 atanga tun thla ni 7 thlenga thubuai an ziah luh zawng zawng hi 288 a ni a; heng thubuai hrang hrangah hian mi 40 man tawhin, chung zinga mi 32 chu thiam loh chantir an ni tawh a. Hemi hun chhunga pawisaa inbumna thubuai an buaipuia sum an hmuh lêt chu Cheng Vbc. 1,14,42,303 a ni.
